မိုင်းရူပ၊ ဇွန်လ ၂၃ ရက်၊ တောင်သာ
မန္တလေးတိုင်း မြင်းခြံခရိုင် တောင်သာမြို့နယ်အတွင်း ပြည်သူ့လွတ်မြောက်ရေးတပ်မတော်- PLA နဲ့ အမျိုးသားညီညွတ်ရေးအစိုးရ- NUG ရဲ့ လက်အောက်ခံတပ်တွေအကြား ပြေလည်မှု မရသေးဘူးလို့ PLA ရဲ့ ပြောရေးဆိုခွင့်ရှိသူ ကိုဝေယံဖြိုးမိုးက ရွှေဖီမြေကို ပြောပါတယ်။
တောင်သာမြို့နယ်အတွင်း ဖြစ်ပွားခဲ့တဲ့ စစ်ရေးတင်းမာမှုနဲ့ နှစ်ဖက်တပ်ရဲ့ ထုတ်ပြန်ချက်မှာ အပြန်အလှန် စွပ်စွဲမှုတွေ ပြုလုပ်ထားတာ တွေ့ရပါတယ်။
NUG ရဲ့ မနေ့ ဇွန်လ ၂၂ ရက် ထုတ်ပြန်ချက်မှာ ပြီးခဲ့တဲ့ မေလ ၂၆ ရက်က ဝဲလောင်ကျေးရွာနေ ဦးသန့် (အမည်လွှဲ) ဆိုသူကို PLA တပ်ဘက်က စစ်ကောင်စီရဲ့ သတင်းပေးဆိုပြီး ၎င်းနဲ့အတူ ပိုင်ဆိုင်မှုတချို့ကို သိမ်းဆည်းသွားတယ်လို့ ဖော်ပြထားပါတယ်။
ဒါ့အပြင် ဦးသန့်ဟာ PLA က စွပ်စွဲထားသလို စစ်ကောင်စီရဲ့ သတင်းပေး မဟုတ်ဘဲ သာမန်ကားသမားသာ ဖြစ်တယ်လို့ ဆိုထားပါတယ်။
အဲဒီနောက် ဦးသန့်ရဲ့ ဇနီးဖြစ်သူထံ ငွေသိန်းနှစ်ထောင် ပေးမှ ပြန်လွှတ်ပေးမယ်လို့ ခြိမ်းခြောက်ပြောဆိုခဲ့တာကြောင့် ၎င်းရဲ့ ဇနီးဖြစ်သူက NUG ထံ အမှုတိုင်ထားပြီး ပြန်လွှတ်ပေးဖို့ ပြောရာကနေ မလွှတ်ပေးတာကြောင့် အခုလို တင်းမာမှုတွေ ဖြစ်ပွားရတာလို့ ဆိုပါတယ်။
မနေ့ ဇွန်လ ၂၂ ရက် နေ့လယ် ၁၂ နာရီဝန်းကျင်မှာတော့ ဦးသန့်ဆိုသူကို PLA က ပြန်လွှတ်ပေးခဲ့ကြောင်း၊ အကြောင်းပြန်ပြီး ဝဲလောင်းရွာနဲ့ ရွာသစ်ကြားမှာ ရိုက်နှက်ခံထားရတဲ့ ဒဏ်ရာနဲ့ ပြန်တွေ့ခဲ့ပြီး ပိုင်ဆိုင်မှုတွေကိုလည်း ပြန်ပေးတာ မရှိဘူးလို့ ဖော်ပြထားပါတယ်။
ဒါ့အပြင် PLA တပ်းခန်းဟောင်းတွေထဲကို NUG တပ်တွေဝင်ရောက်ချိန် မိုင်းထောင်ထားတာကြောင့် ရဲဘော် ၄ ဦးသေဆုံးပြီးအများအပြား ထိခိုက်ဒဏ်ရာရတယ်လို့ ဆိုပါတယ်။
PLA တပ်ဘက်ကတော့ ၎င်းတို့ စစ်ဆေးချက်အရ ဦးသန့်ဟာ စစ်ကောင်စီရဲ့ သတင်းပေးတစ်ဦးဖြစ်ပြီး ၎င်းရဲ့ ဇနီးဖြစ်သူက ငွေပေးပြီး ပြန်လွှတ်ဖို့ ညှိနှိုင်းခဲ့ပေမယ့် လက်ခံခဲ့တာ မရှိဘူးလို့ ထုတ်ပြန်ထားပါတယ်။
NUG ဘက်က PLA ရဲ့ တပ်စခန်းတွေကို မြင်းခြံခရိုင်ကနေ ဆုတ်ခွာဖို့ ပြောဆိုနေတာကြောင့် ဒီနေ့ ဇွန်လ ၂၃ ရက်အထိ စစ်ရေး ဆက်လက်တင်းမာနေတယ်လို့ PLA ရဲ့ ပြောရေးဆိုခွင့်ရှိသူ ကိုဝေယံဖြိုးမိုးက ပြောပါတယ်။
“တောင်သာမှာ ဖြစ်နေတဲ့ ပြဿနာကတော့ မပြေလည်သေးဘူးဗျ။ နှစ်ဖက်ခေါင်းဆောင်တွေ တွေ့ဆုံနိုင်ဖို့ ကြိုးစားနေတဲ့ အခြေအနေမှာပဲ ရှိနေပါတယ်” လို့ ဆိုပါတယ်။
တော်လှန်ရေးအင်အားစုတွေကတော့ NUG နဲ့ PLA အကြား ဖြစ်ပွားနေတဲ့ စစ်ရေးတင်းမာမှုတွေကို ဆွေးနွေးညှိနှိုင်းတဲ့ နည်းနဲ့သာ အဖြေရှာကြဖို့ တော်လှန်ရေးအင်အားစုတွေက တိုက်တွန်းထားကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
