ရွှေဖီမြေ၊ ဇွန်လ ၂၂ ရက်
အွန်လိုင်းလောင်းကစားဖြစ်တဲ့ စလော့ဂိမ်းဆော့တဲ့သူတွေကို စစ်ကောင်စီတပ်ရဲ့ လက်အောက်ခံရဲတွေက ဖမ်းဆီးမှုတွေ ပြုလုပ်လာတယ်လို့ သိရပါတယ်။
ပြီးခဲ့တဲ့ ဇွန်လ ၁၉ ရက်မှာ ရှမ်းတောင် ကလောမြို့ ရပ်ကွက် (၇) မှာ စလော့ဂိမ်းဆော့နေတဲ့ အမျိုးသား ၂ ဦးအား စစ်ကောင်စီရဲ့ လက်အောက်ခံရဲတွေက ဖမ်းဆီးရမိခဲ့တယ်လို့ စစ်ကောင်စီဘက်က သတင်းထုတ်ပြန်ထားပါတယ်။
ဖမ်းဆီးရမိတဲ့ အမျိုးသားနှစ်ဦးကို ကလောမြို့ရဲစခန်းမှာ လောင်းကစားဥပဒေနဲ့ အမှုဖွင့်ထားတယ်လို့ ဆိုပါတယ်။
စစ်ကောင်စီတပ်ဟာ ပြီးခဲ့တဲ့ မေလကစလို့ စလော့ဂိမ်းဆော့တဲ့သူတွေကို ဖမ်းဆီးမှုတွေ လုပ်ဆောင်လာတာ တွေ့ရပြီး ပြီးခဲ့တဲ့ မေလ ၂၆ ရက်မှာလည်း စလော့ဂိမ်းဆော့တဲ့ ကလောမြို့နယ် အောင်ပန်းမြို့က အမျိုးသားတစ်ဦးကိုလည်း ဖမ်းဆီးသွားခဲ့ပါတယ်။
မြန်မာနိုင်ငံမှာ စလော့ဂိမ်းကြောင့် အကြွေးနွံနစ်ပြီး ကိုယ့်ကိုယ်ကိုယ် အဆုံးစီရင်တာတွေ၊ လူသတ်မှုတွေ၊ ငွေကြေးလိမ်လည်မှုတွေ မကြာခဏ ဖြစ်ပွားနေသလို အိမ်ထောင်ရေးပျက်စီးတာတွေလည်း ရှိနေပါတယ်။
စစ်ကောင်စီတပ်ဘက်ကတော့ အွန်လိုင်းလိမ်လည်မှုနဲ့ အွန်လိုင်းလောင်းကစားမှု တိုက်ဖျက်ရေးလုပ်ငန်းတွေကို အမျိုးသားရေးတာဝန်တစ်ရပ်အဖြစ် တိုက်ဖျက်နှိမ်နင်းသွားမယ်လို့ ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
