ဆျှိုည်ဖီမျေ၊ ကျံရ်ဇူန် ဆငည်း 19၊ ကုင်ငှေါႇ
ကဝ်အီကဒံပ်တောပ် တာဘြောင်ရဝ်ကုင်ငှေါႇကဲအူအီး က္လာင်းတဖုင်ဆျှိုည်ဖီမျေဒါႈ ဒီထိင်ခြဲတံပ်ဆီုက်တအာင်း PSLF/TNLA ကဲ ပကပီုန်ဆျှံမ်ကဒါႇပိူည် ပကုင်ငှေါႇနီန် ဂေါႇမိုႈအ်ုန်မိုႈ ခိင်တီႇဆ်ုမ် တိုအီးအရာပ်ကဲတဂီုင်နီန် ကနာည်နံင်ဘိူန်းဟံပ်အိုမ် ခေဲင်ကတာည်းဂီုင်နီန် ပ်ုန်ကိူဝ်ႈကဲတခြီရ် ရကႎိုည်ဒီခြံင်အိုမ်နီန် ကဲဒါႈနံင်ဇံင်းဟာဝ်း ဘည်ကိူဝ်ႈခြီရ်နီန် အူကဇေန်
အ်ုန်ဒါႈ “ ကဒါႇယဲ ပုင်တဲအ်ုန် ကရႎိုည်ပ္လေါင်အိုမ်နီန် အ်ုန်မိုႈ ဒီဒါကဲနအိုမ် ဂေါႇဘည်ဒီန် ကဒါႇယဲမိူဝ်ႈအေ့ ဘည်ဘိဒဲႈအိုမ်”။
အ်ုန်ဆီုပ်ဒါႈဘိုး အာည်ႇဘိကဲတ ဘည်ကိူဝ်ႈခြီရ်နီန်မာ် ကဲကတူႈကငျားကယိူဝ်းတောပ်ဘိုး တိုအီးရဝ် ကညာဂီုင်း ကာည်း တာဘြောင်ရဝ်ကဲနီန် အ်ုန်အီဒီကိူဝ်ႈခြီရ် ပ်ုန်ဘိူန်းဘိမာ်မာ် ကဲဘိဟာဝ်းဖါ်ႈ အ်ုန်အီမိုႈ ဒီအာဝ်ဘိူန်းဘိနီန်မာ် ကဲခွါင်းဒဲႈ ကဲဆီုပ်ကိူဝ်ႈဟာဝ်းအောႏ။
ကဝ်အီဒါႈနီန် ဆီုက်ဒါႈဘိုး “ အ်ုန်အီမိုႈ ဂိုးဒီခြံင်အိုမ်နီန် ဘာည်းနံင်ဘိအ်ုန်ဂီုန်း။ ဆာ်မိုႈရခြူမ် ဒီခြံင်အိုမ်ပေန်ခ္လဒိူန် ကဲအာဝ်ဘိစိ မိုႈလိူည် ကဲရေဲန်နံင်အိုမ်နီန်အာဝ်လေႈ။ ဘိူည်ဘာည်းဒီန်မာ် ဂေါႇပ်ုန်ဟြာင်းက္လာင်းတိုအီးအရာပ်ကဲ အိုမ်ကဲဒီန် ဂီုည်လီပ်ဖါ်ႈ ခေဲင်ဂီုင် ကဒါႇယဲမာ် ဟာဝ်းစေတ်မေန်းဖါ်ႈ စီဘိအူန်း”အောႏ။
မိူဝ်ႈဘိုး တိုအီးအရာပ် ကဝ်အီအာဝ်ဆိင်ဒဲႈဇီုဝ်လေႈနီန်အူအီး က္လာင်းဒါႈ ကဲအီဇံင်းဟာဝ်း ဘည်ကိူဝ်ႈတခြီရ်နီန် အ်ုန်မိုႈ ဂိုးကတာည်းဂီုင် ပပ္လေါင်အိုမ်နီန် ဆာ်မိုႈရခြူမ်အ်ုန် တောပ်ပည်ရဝ်မန်ပင့်နီန် ကဒါႇဒီန် အာဝ်မိူဝ်ႈစိ ဘည်ဇံင်းဟာဝ်း ဘည်ကိူဝ်ႈခြီရ်နီန်အောႏ။
လူမ်ဘြောင်ချှာင် ပကုင်ငှေါႇပ္လိူရ်ႈလေႈဒါႈ အ်ုန်အီမိုႈ ဇီုင်းကာန်ကိူဝ်ႈခြီရ် ခေဲင်လှံင်ကုင်ငှေါႇနီန် ဇူႈဒါကျံရ်ဇူန် ဆငည်း 1 နီန် ရောတ်ဘံင်ကျံရ်ဇူန်လည် ဆငည်း 15 နီန် 1 ကျံရ်လေႈအူကဒည်နီန် လိုဇံင်းဟာဝ်း ဘည်ကိူဝ်ႈခြီရ်နီန် ဆာ်တောပ်ဘာည်းပ်ုန်ပ္လိူရ်ႈလေႈကဲနီန် ကဲဒါႈနံင်တိူဝ်ႈဟာဝ်းအရေးအောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
