ပပ၊ ဇွန်လ ၂၀ ရက်၊ မြဝတီ
ထိုင်း-မြန်မာနယ်စပ်မြို့ ကရင်ပြည်နယ် မြဝတီမြို့မှာ နေအိမ်တစ်လုံး မီးလောင်တာကြောင့် ကလေးငယ် ၂ ဦး သေဆုံးခဲ့ကြောင်း မြို့ခံအမျိုးသားရဲ့ ပြောပြချက်အရ သိရပါတယ်။
မနေ့ ဇွန်လ ၁၉ ရက် ညနေ ၄ နာရီဝန်းကျင်မှာ မြဝတီ ရပ်ကွက် ၅ ခေါက်မလိလမ်းကြားရှိ နေအိမ်တစ်လုံးက ဂတ်စ်အိုးမီးကနေ အနီးရှိ ဓာတ်ဆီပုံးကို မီးကူးစက်လောင်ကျွမ်းခဲ့ရာ ၁ နှစ်နဲ့ ၁၄ နှစ်အရွယ် ကလေးနှစ်ဦး မီးလောင်ခဲ့တာပဲ ဖြစ်ပါတယ်။
မြို့ခံအမျိုးသားက “အဲကလေးနှစ်ယောက်က အိပ်ခန်းထဲ အိပ်နေတယ်လို့ပြောတယ်။ အဖိုးတစ်ယောက်လည်း မီးလောင်ဒဏ်ရာ ရထားတယ်။ အိမ်နီးချင်းတွေ ပြောတာက အဲကလေးတွေရဲ့အဖေက မီးလောင်နေတဲ့အချိန်က ရှိထားတယ် သူက ကားတွေ ထုတ်နေလို့တဲ့” လို့ ပြောပါတယ်။
အသက် ၇၅ နှစ်အရွယ် အမျိုးသားဟာ ခြေထောက်၊ လက်မောင်းနဲ့ ကျောပြင်မှာ ဒဏ်ရာ ရခဲ့တာကြောင့် မြဝတီပြည်သူ့ဆေးရုံကြီးသို့ ဆေးကုသမှု ခံယူနေရကြောင်း အထက်ပါအမျိုးသားက ပြောဆိုပါတယ်။
မီးလောင်တဲ့နေရာသို့ မီးသတ်ကား ရောက်လာပြီး ၁ နာရီဝန်းကျင် မီးသတ်ခဲ့ရကြောင်း မြဝတီမြို့ရှိ မီးသတ်ဌာနက သတင်းထုတ်ပြန်ထားပါတယ်။
ပြီးခဲ့တဲ့ မေလ ၁၇ ရက်ကလည်း မြဝတီမြို့ အမှတ် ၄ သံတံတားအနီးမှာ မီးလောင်မှု ဖြစ်ပွားခဲ့ဖူးပါတယ်။
အလားတူ ရှမ်းမြောက် မူဆယ်မြို့မှာလည်း မနေ့ ဇွန်လ ၁၉ ရက် မနက် ၈ နာရီခွဲမှာ နဂါးနှစ်ကောင်ဟိုတယ် KTV မီးလောင်ခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
