ရွှေဖီမြေ၊ ဇွန်လ ၁၇ ရက်၊ ကွတ်ခိုင်
ကွတ်ခိုင်မြို့နယ် ငေါ့ငါ့ကျေးရွာမှာ ကိုးကန့်တပ် – MNDAA ရဲ့ ရွှေတူးဖော်မှု ရပ်နားခြင်းမပြုတာကြောင့် ဒေသခံတွေရဲ့ လယ်ဧက ၁၀၀ ကျော် စိုက်ပျိုးလို့မရဖြစ်နေတဲ့အချိန်မှာ ငေါ့ငါ့ကျေးရွာဝန်းကျင်မှာ သတ္တုတူးဖော်မှုလုပ်ငန်းထပ်မံလုပ်ဆောင်နေတယ်လို့ ဒေသခံတွေဆီကနေ သိရပါတယ်။
“သတ္ထုက ၅ လပိုင်းက စရှာတာ။ ရပ်ရွာက အစပေးမတူးဘူး။ ဒါပေမဲ့ မပေးရင်လည်း တူးမယ်ဆိုပြီး ဖိအားပေးပြီး အတင်းစာချုပ်ချုပ်ပြီးတူးတာ။ စာချုပ်တဲ့အထဲ ရပ်ရွာအားလုံးရဲ့ သဘောဆန္ဒအရချုပ်တာမဟုတ်ဘူး။ ရပ်ရွာကော်မတီ အချို့နဲ့ ရပ်ရွာစာရေးတွေက လုပ်သွားတဲ့ ပုံစံမျိုးဖြစ်နေတယ်”
အမည်မဖော်လိုတဲ့ ရွာခံတစ်ဦးက အခုကိုးကန့်တပ်တူးဖော်မယ့် သတ္ထုဟာ ဘယ်လိုသတ္ထုမျိုးလဲဆိုတာ မသိရှိသလို စာချုပ်မချုပ်ခင်တုန်းက ဧရိယာ တစ်မိုင်ဝန်းကျင်သာတူးဖော်မယ်လို့သက်ဆိုင်ရာက ပြောခဲ့ပေမဲ့ စာချုပ်ချုပ်ဆိုလိုက်တဲ့အချိန်မှာတော့ ၁၀ မိုင်အထိ တူးမယ်ဖြစ်ကြောင်း သိရတယ်လို့ ဆိုပါတယ်။
“ဆယ်မိုင်အထိကျော်အထိ လုပ်လာတော့ လုပ်ကိုင်စားသောက်နေတဲ့ လက်ဖက်ခြံတွေလည်း ပါကုန်တာ။ ရပ်ရွာကတော့ မလုပ်စေချင်ဘူး။ သွားပြောကြည့်သေးတယ်။ သူတို့ထိန်းချုပ်နယ်မြေဖြစ်လို့ လုပ်မှာပဲဆိုတဲ့ပုံစံ။ ပြောချင်ရင် လောက်ကိုင်အထိ သွားပြောရမယ်လို့ ပြန်ပြောတယ်”
ငေါ့ငါ့ကျေးရွာ သတ္ထုတူးဖော်မှုကို ကိုးကန့်တပ်က ဦးဆောင်နေတာဖြစ်ပြီး တူးဖော်မယ့်ဧရိယာတွေမှာ ကိုးကန့်တပ်က လုံခြုံရေးတွေလည်း ယူထားကြောင်းသူက ဆက်ပြီးပြောပါတယ်။
ငေါ့ငါ့ကျေးရွာမှာ အခုလို ကိုးကန့်တပ် – MNDAA က လယ်ကွက်တွေမှာ ရွှေတူးဖော်တာ၊ လက်ဖက်ခြံတွေနဲ့ ရွာပိုင်မြေတွေမှာ သတ္ထုတူးဖော်မှုတွေ မလုပ်ဖို့ ရွာခံတွေက တောင်းဆိုနေကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
