ဆျှိုည်ဖီမျေ၊ ကျံရ်ဇူန် ဆငည်း 17၊ အေဲမ်ကိုက်
ကောန်အီပ်ုန်ကဝ်အီဂေါည်ခေဲင်အရာပ်နီန်အူအီး က္လာင်းတဆျှိုည်ဖီမျေဒါႈ ဘိူည်ဟြာင်းက္လာင်းတ တံပ်ကိုးကာင်း MNDAA ကဲ ကနာည်နံင်ႎိူဝ်ႈဒဲႈကျောင်ပနောဘေဲႇ ခေဲင်ကီုင်းအေဲမ်ကိုက် ကပီုန်ဆျှံမ်ကဒါႇပိူည်နီန်မာ် မောကံပ်လှေင်ဘြည်အူကျံရ် ညှံမ်ယိူဝ်းစိကဲက္လာင်းဒေဲႈဆေအောႏ။
ခည်ကျံရ်မေ ဆငည်း 19ဒိူန် ကဲဘိူည်ဟြာင်းက္လာင်းတတံပ်ကိုးကာင်းကဲ ကနာည်နံင်ႎိူဝ်ႈဒဲႈကျောင်ပနောဘေဲႇ ပကီုင်းအေဲမ်ကိုက်နီန်မာ် မောကံပ်ရောတ်ကဇေန်နီး ညှံမ်ယိူဝ်းစိကဲပ္လါန်ဒေဲႈကြောႈအောႏ။
“အာဝ်မိုႈစိကဆီုဝ်ဇီုဝ် TLEC။ ယဲမှာန်းအူန်းလိူည် ဒါဇီုဝ်ကဆီုဝ်ထုင်မှိူမ်ကာည်းဘေဲႇဘာန်း။ ဆာ်မိုႈ TLEC ဘည်မှောမာ် ကဲအာဝ်ဒဲႈစိ။ အဆော်င်မာ် ဘာည်းလိူည်ဒီန် ယိူဝ်းကဲဒါႈ ကဲအာဝ်ဒဲႈယာ့်။ နံင်ဒဲႈမာ် အာဝ်ဒါႈ အာဝ်ဒဲႈမာ်အာဝ်ဒါႈ ကဇေန်နီး ဘာည်းလိူည်ကဲညှံမ်က္လာင်းဒေဲႈစိဆေ”
ဂေါႇမိုႈကဲညှံမ်ႎိူဝ်ႈကျောင် ခေဲင်ကီုင်းအေဲမ်ကိုက်နီန် စီပဲန်ကောန်ကျောင်ကဲ မံင်ခ္လ ဟည်ခ္လါည်းဟာဝ်းဟိုက်ဒိုႇ ကျောင်ပအရာပ်ဒီဟံရ်ကာည်း လှံင်အီဟံရ်အောႏ။
“ကောန်ဒဲႇအီလေႈဟာဝ်း ပကုင်ဘြာန်မာ်မိူဝ်ႈ။ အီဟာဝ်းကဒါႇ အရာပ်ကုင်ဝမာ်မိူဝ်ႈ။ အီလေႈဟာဝ်းကဒါႇကီုင်းလာဆေဝ်မာ် မိူဝ်ႈအေ့။ ဆာ်မိုႈကဲဘယ်ဒေႎိူဝ်ႈကျောင်ပနီန် မံင်ခ္လမာ် နံင်ႎီရ်ဒေဲႈဒီးကော်။ ဘံန်မိုႈပအေဲမ်ကိုက်နီန် ညှံမ်ႎိူဝ်ႈကျောင် တာဆြာယာဆြာကဲမာ် ဟည်ခ္လါည်းဟာဝ်းဒိုႇ ပကီုင်းအီဟံရ်။ ကဇေန်နီး ယဲတောႇအူန်း တာဆြာယာဆြာ ကဲအီဆိင်ႎီရ်ဒေဲႈ ကဒါႇနီန်ကဲနီန်”
ဆာ်မိုႈပအရာပ်မိုင်းဆီး လှံင်အေဲမ်ကိုက်နီန် ကျောင် TLEC ကဲ ႎိူဝ်ႈဟာဝ်းလိူည် 9ကျောင် မောကံပ်ရောတ်ကဇေန်နီး တာဆြာယာဆြာ ညှံမ်ဂိူပ်ကျံဝ်းစိဒါအောႏ။
“ခံင်မိုႈတာဆြာယာဆြာကဲ ညှံမ်ရောတ် ဘည်ရံပ်ခါမ်ကောန်ကျောင်ကဲနီန်မာ် ညှံမ်မိူဝ်ႈစိ။ ကဇေန်နီး ဆီုင်ဒါ့်ကစုအူန်းစြာင်း။ ကဲပ်အူန်းလိူည်စြာင်းဒါႈ အဆေနံင်လီပ်ဒေဲႈခေဲင်ကျောင်ကဲနီန်။ ကဒါႇမိုင်းဆီးမိုင်းဟော်မ်ကဲနီန် ဘိူန်းအူန်းလိူည်စြာင်း ကနာည်ကျောင် 9ကျောင်။ နံင်ႎိူဝ်ႈအာဝ်ႎိူဝ်ႈမာ် အာဝ်နံပ်စိ”
ဆဲႈဒါႇဒီန် ကဒါႇအရာပ်နံမ့်ဖကာကဲနီန်မာ် ဘိူန်းအယ်နံပ်တောပ်စြာင်းပ်ုန်ဘိူန်းအူန်း TLEC ကဲ နံင်ႎိူဝ်ႈဟာဝ်းကျောင် 26ကျောင်အောႏ။
ဇိုချီုင်ဆန်ုမ်ပနောဘေဲႇ 2025-2026 ဒိူန် TLEC ကဲ ဘယ်ပွံတ်ဒေႎိူဝ်ႈဟာဝ်းကျောင် ခေဲင်လှံင်အေဲမ်ကိုက်နီန် 107ကျောင် ကောန်ကျောင်ကဲ ဂေါည်ပွံတ် 3ဟြဲင်အီးလေႈအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
