မြတ်နိုး၊ ဇွန်လ ၁၁ ရက်၊ ဖားကန့်
ကချင်ပြည်နယ်၊ ဖားကန့်မြို့နယ် လုံးခင်းနဲ့ မှော်စီစာကျေးရွာတွေမှာ စစ်ကောင်စီတပ်နဲ့ ဆက်စပ်အဖွဲ့ဝင်တွေက ပြည်သူတွေအပေါ် ဓားပြတိုက်မှုတွေ ဆက်တိုက်ကျူးလွန်နေပြီး နေအိမ်အတွင်းအထိ ဝင်ရောက်ကာ သေနတ်ထောက် လုယက်တာတွေ ဖြစ်ပွားနေတယ်လို့ ဒေသခံတွေထံက သိရပါတယ်။
ဒီနေ့ ဇွန် ၁၁ ရက် မနက် ၅ နာရီခွဲဝန်းကျင်က လုံးခင်းကျေးရွာ ရပ်ကွက် (၅) ရှိ နေအိမ်တစ်အိမ်ကို လက်နက်ကိုင် အမျိုးသားနှစ်ဦးက ခြံအတွင်း ခုန်ဝင်ကာ သေနတ်ထောက် ဓားပြတိုက်ခဲ့ပြီး ငွေကျပ် သိန်း ၃၀ ကျော် ယူဆောင်သွားခဲ့တယ်လို့ သိရပါတယ်။
“ပြည်သူ့စစ်က လူတွေ လုပ်စားနေတာ ကြာပြီ။ လူမဆန်တဲ့ လုပ်ရပ်တွေပဲ။ အခုဆို အိမ်ထဲအထိ ဝင်ပြီး သေနတ်ထောက် ဓားပြတိုက်နေတဲ့ အခြေအနေ ဖြစ်နေပြီ” လို့ ဒေသခံတစ်ဦးက ရွှေဖီမြေကို ပြောပါတယ်။
အဆိုပါ ဓားပြတိုက်မှုနဲ့ ပတ်သက်ပြီး နယ်မြေတာဝန်ယူထားတဲ့ တော်လှန်ရေးတပ်ဖွဲ့ဝင်တွေက ကာယကံရှင်တွေနဲ့ တွေ့ဆုံစစ်ဆေးခဲ့ရာ ကျူးလွန်သူတွေဟာ ဝါရာဇွပ် မင်းဇေသန့် ဦးဆောင်တဲ့ ပြည်သူ့စစ်အဖွဲ့နဲ့ ဆက်စပ်သူတွေ ဖြစ်တယ်လို့ အတည်ပြုနိုင်ခဲ့ကြောင်း သိရပါတယ်။
“ဝါရာဇွပ် မင်းဇေသန့် ပြည်သူ့စစ်ကလို့ သိရတယ်ဗျ။ အတည်ပြုတယ်။ အဲဒီနှစ်ယောက် ဓားပြတိုက်တာဆိုတာကို နယ်မြေတာဝန်ကျ ရဲဘော်တွေက အိမ်ရှင်နဲ့ သွားတွေ့ပြီး စစ်ဆေးအတည်ပြုထားတယ်။ အခုလည်း လိုက်ရှာနေတယ်။ ဒါပေမဲ့ မှော်စီစာဘက်မှာ စစ်ကောင်စီက ကင်းတွေချထားတာနဲ့ စစ်ရေးအခြေအနေကြောင့် အခက်အခဲရှိတယ်” လို့ တော်လှန်ရေးအင်အားစုနဲ့ နီးစပ်သူတစ်ဦးက ပြောပါတယ်။
ပြီးခဲ့တဲ့ မေလ ၂၈ ရက်ကလည်း လုံးခင်းကျေးရွာ ရပ်ကွက် (၃) မှာ နေထိုင်တဲ့ ဝက်ခြံလုပ်ငန်းရှင်တစ်ဦးရဲ့ နေအိမ် ဓားပြတိုက်ခံရပြီး ငွေကျပ် သိန်း ၁၂၀ ခန့် ဆုံးရှုံးခဲ့ရကြောင်း သိရပါတယ်။
ဒေသခံတွေရဲ့ ပြောကြားချက်အရ စစ်ကောင်စီတပ်နဲ့ ဆက်စပ်အဖွဲ့တွေဟာ လုံးခင်းနဲ့ မှော်စီစာကျေးရွာတွေမှာ အခြေချ နေရာယူလာခဲ့တဲ့ နှစ်လကျော်ကာလအတွင်း လမ်းသွားပြည်သူတွေရဲ့ ဆိုင်ကယ်၊ ဖုန်း၊ ငွေကြေးနဲ့ ကျောက်မျက်ရတနာတွေကို လုယူတာ၊ နေအိမ်တွေထဲ ဝင်ရောက် ဓားပြတိုက်တာတွေ မကြာခဏ ဖြစ်ပွားနေပြီး မေလတစ်လအတွင်းမှာပဲ ဓားပြမှု (၁၀) မှုထက်မနည်း ဖြစ်ပွားခဲ့တယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
