ရွှေဖီမြေ၊ ဇွန်လ ၅ ရက်၊ နမ့်ခမ်း
ဘေးသင့်တဲ့ ရှမ်းမြောက် နမ့်ခမ်းမြို့နယ် ကောင်းတပ်ကျေးရွာက ဒေသခံတွေ ပြန်လည်ထူထောင်နိုင်ရေးအတွက် လားရှိုးမြို့ရှိ “ဝ”ဆက်ဆံရေးရုံးနဲ့ ရှမ်းတပ် SSPP က သိန်း (၁၀၀) စီ လှူဒါန်းပေးခဲ့တယ်လို့ သိရပါတယ်။
မနေ့ ဇွန်လ ၄ ရက်မှာ ပြန်လည်ထူထောင်နိုင်ရေးအတွက် အလှူငွေ သိန်း (၁၀၀) စီ လာရောက်လှူဒါန်းပေးခဲ့တာဖြစ်ပြီး အဲဒီအပြင် SSPP တပ်က ဆန် (၂၀) အိတ်လည်း ထပ်မံလှူဒါန်းပေးခဲ့ပါတယ်။
ကောင်းတပ်ပေါက်ကွဲမှုအတွက် နမ့်ခမ်းလူငယ်အဖွဲ့၊ ခိုလုံလီရှော တိုင်းရင်းသား ယဉ်ကျေးမှုအဖွဲ့နဲ့ တခြားဒေသအသီးသီးကလည်း လာရောက်လှူဒါန်း ပေးခဲ့ကြပါတယ်။
မနေ့ ဇွန်လ ၄ ရက်အထိ ကောင်းတပ်ကျေးရွာ ပြန်လည်ထူထောင်ရေးကော်မတီက အလှူငွေ ကျပ်သိန်းတစ်ထောင်ကျော် (၁၆၆,၄၄၀,၇၀၀) အပြင် တရုတ်ယွမ် ၈ ထောင်ဝန်းကျင် (၇,၉၈၅) လက်ခံရရှိထားပါတယ်။
ဒါ့အပြင် နမ္မတူ၊ နမ့်ဆန်၊ မန်တုံ၊ နမ့်ခမ်း၊ ကွတ်ခိုင်၊ မူဆယ်နဲ့ လားရှိုး စတဲ့မြို့နယ်အသီးသီးတွေမှာလည်း ကောင်းတပ်ရွာ ပြန်လည်ထူထောင်နိုင်ရေးအတွက် အလှူငွေ အသီးသီးကောက်ခံပေးနေကြတာ တွေ့ရပါတယ်။
အခြေခံ အစားအစာဖြစ်တဲ့ ဆန်၊ ဆီ၊ ဆားနဲ့ တခြားအသုံးအဆောင်ပစ္စည်းတွေအပြင် အရေးပေါ်သုံးစွဲဖို့အတွက် ဆေးဝါးတွေလည်း အကူအညီ လိုအပ်နေသေးကြောင်း သိရပါတယ်။
မေလ ၃၁ ရက်မှာ ဖြစ်ပွားခဲ့ ယမ်းဂိုဒေါင်ပေါက်ကွဲမှုကြောင့် ရွှေဖီမြေက ရရှိထားတဲ့ စာရင်းအရ အသက်ဆုံးရှုံးရသူ ၆၀ ဦးနဲ့ ဒဏ်ရာရရှိသူ ၁၀၀ ကျော် ရှိခဲ့ပါတယ်။
ဒါ့အပြင် ကောင်းတပ်ရွာက နေအိမ် ၃၀၀ ကျော်လည်း ပျက်စီးဆုံးရှုံးခဲ့ရပြီး အဲဒီထဲမှာ နေအိမ် ၄၀ ကျော်က မီးလောင်ပြာကျခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
