လက်ဖက်မြေ၊ မေလ ၂၃ ရက်၊ နမ္မတူ
တအာင်းတပ်မတော် ထိန်းချုပ်ထားတဲ့ ရှမ်းမြောက် နမ္မတူမြို့နယ် ပန်လုံကျေးရွာမှာ ကလေးငယ်တွေ မီးခြစ် ဆော့ကစားရာကနေ နေအိမ်မီးလောင်မှု ဖြစ်ပွားခဲ့တယ်လို့ ဒေသခံအမျိုးသမီးတစ်ဦးက ရွှေဖီမြေကို ပြောပါတယ်။
ဖြစ်စဉ်ဟာ မနေ့ မေလ ၂၂ ရက် မနက် ၁၀ နာရီဝန်းကျင်မှာ မိဘက ခြံသို့ သွားနေချိန် အိမ်မှာ ကျန်ခဲ့တဲ့ ကလေးငယ် ၂ ဦးက မီးခြစ် ဆော့ကစားရာကနေတဆင့် နေအိမ် မီးလောင်မှု ဖြစ်ပွားခဲ့တာလို့ ဆိုပါတယ်။
ဒေသခံ အမျိုးသားက “ကလေးတွေတော့ ဒဏ်ရာ ရရှိတာမျိုးတော့ မရှိပါဘူး ဘေးကင်းပါတယ်။ ဒီဘက်မှာကျ မိဘတွေက ကလေးတွေကို အိမ်မှာပဲ ထားခဲ့ပြီး သူတို့ကျ ခြံ သွားတာပေါ့” လို့ ပြောပါတယ်။
မီးလောင်မှုကြောင့် စုစုပေါင်း ကာလတန်ဖိုး သိန်း ၈၀ နီးပါး ဆုံးရှုံးခဲ့တယ်လို့ ဆိုပါတယ်။
ပြီးခဲ့တဲ့ ဇန်နဝါရီ ၂၂ ရက် နေ့လယ် ၃ နာရီဝန်းကျင်မှာလည်း နမ့်ဆန်မြို့ပေါ် ဇယန်းကြီးဘုန်းကြီးကျောင်း မီးလောင်မှု ဖြစ်ပွားခဲ့ဖူးပါတယ်။
နွေရာသီမှာ အပူချိန်မြင့်ပြီး မီးလောင်မှု ဖြစ်ပွားစေနိုင်တာကြောင့် သက်ဆိုင်ရာ အဖွဲ့အစည်းတွေအနေနဲ့ ကျေးရွာပိုင်း ကွင်းဆင်းပြီး ဒေသခံလူထုတွေကို အသိပညာပေးတာနဲ့ သတိပေးတာတွေ လုပ်ဆောင်ပေးစေလိုကြောင်းလည်း ဒေသခံတွေက ပြောပါတယ်
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
