ရွှေဖီမြေ၊ ဇန်နဝါရီ ၂၇ ရက်
စစ်ကောင်စီရဲ့ ပြည်သူ့စစ်မှုထမ်းအဖြစ် အတင်းအဓမ္မ စုဆောင်းခံရပြီး ကရင်နီပြည် ရှေ့တန်းစစ်ဆင်ရေးသို့ ပို့ဆောင်ခံရတဲ့ စစ်သား ၇ ဦးက ကရင်နီအမျိုးသားများ ကာကွယ်ရေးတပ်- KNDF ထံ ထွက်ပြေးခိုလှုံလာခဲ့တယ်လို့ မနေ့ ဇန်နဝါရီ ၂၆ ရက်မှာ KNDF က ထုတ်ပြန်ထားပါတယ်။
ပြီးခဲ့တဲ့ ဇန်နဝါရီ ၂၃ ရက်မှာ လွိုင်လင်လေးမြို့ပြင်က ထီးစဲခါးကင်းစခန်းတစ်ခုကနေ ထွက်ပြေးလာတဲ့ ခလရ ၂၄၇ မှ တပ်သား ၄ ဦးက MA-3 ၃ လက်၊ MA-1 ၁ လက်နဲ့အတူ KNDF တပ်ရင်းထံ လာရောက်ခိုလှုံခဲ့ပါတယ်။
အလားတူ ဇန်နဝါရီ ၁၉ ရက်မှာလည်း လွိုင်ကော်မြို့ပြင်က ကင်းစခန်းတစ်ခုကနေ လက်နက်မဲ့ ထွက်ပြေးလာတဲ့ ခမရ ၄၃၀ တပ်ရင်းမှ တပ်သား ၃ ဦးကလည်း KNDF ထံ လာရောက် ခိုလှုံခဲ့ပါတယ်။
KNDF ထံ ထွက်ပြေးခိုလှုံလာတဲ့ စစ်သားက စစ်မှုထမ်းဖို့ဆန္ဒ လုံးဝ မရှိကြဘဲ စစ်ကောင်စီက ပေါ်တာဆွဲတာကို ခံရသူနဲ့ အတင်းအဓမ္မ စုဆောင်းခံရသူ ဖြစ်ကြပြီး ရှေ့တန်း စစ်ဆင်ရေးအတွင်း ထွက်ပြေးခိုလှုံလာခဲ့ကြတာလို့ ဆိုပါတယ်။
စစ်ကောင်စီရဲ့ တပ်သားအဖြစ် ကျန်ရှိနေတဲ့တပ်ဖွဲ့ဝင်ေတွအနေနဲ့ စစ်အာဏာရှင် လူတစ်စုရဲ့ အကျိုးစီးပွားအတွက် ရပ်တည်နေမယ့်အစား အခုလို အချိန်မီ လူထုထံ ခိုလှုံပြီး ဂုဏ်သိက္ခာရှိစွာ ရှင်သန်ကြဖို့လည်းတိုက်တွန်းထားပါတယ်။
