ခိုင်လေး၊ ဇန်နဝါရီ ၂၇ ရက်၊ မကွေး
မကွေးတိုင်း အမ်း-ပဒါန်းလမ်းကနေ တစ်ပတ်ကျော်အတွင်း ထွက်ပြေးလာတဲ့ စစ်ကောင်စီတပ်သားကို အရှို ချင်းကာကွယ်ရေးတပ်- CDF Asho က ပိတ်ဆို့တိုက်ခိုက်ရာ စစ်သုံ့ပန်း ၁၇ ဦး ဖမ်းဆီးရမိခဲ့တယ်လို့ CDF Asho က ဒီနေ့ ဇန်နဝါရီ ၂၇ ရက်မှာ ထုတ်ပြန်လာပါတယ်။
အပြန်အလှန် ပစ်ခတ်တိုက်ခိုက်မှုမရှိဘဲ တိုက်ပွဲအတွင်း ထွက်ပြေးလာတဲ့ စစ်သားကို ပိတ်ဆို့တိုက်ခိုက်ခဲ့တာလို့ CDF Asho မှ တာဝန်ရှိသူ ဆလိုင်း ရိုးချင်းက ရွှေဖီမြေကိုပြောပါတယ်။
“တစ်ယောက်တစ်ဖွဲ့ နှစ်ယောက်တစ်ဖွဲ့ လေးယောက်တစ်ဖွဲ့ ငါးယောက်တစ်ဖွဲ့ ပုံစံအမျိုးမျိုး ပြေးလာတာ။ မကွေးတိုင်းကို ရောက်လာတော့ ကျနော်တို့ဘက်ကတားဆီးဖမ်းဆီးတာပါဗျ။ အလံဖြူထောင်ပြီး အလင်းဝင်လာတယ်လို့လည်း ပြောလို့မရဘူး။ တချို့က တိုက်ပွဲကနေ ရှုံးပြီး ထွက်ပြေးလာတာ ရှိသလို သူတို့တပ်စွဲထားတဲ့ စခန်းကနေ ပြေးလာတာလည်း ရှိတယ်”
ပြီးခဲ့တဲ့ ဇန်နဝါရီ ၁၇ ရက်ကစပြီး ၂၅ ရက်အထိ ပိတ်ဆို့တိုက်ခိုက်ခဲ့တာဖြစ်ပြီး MA-1 ၅ လက်၊ MA-2 ၁ လက်၊ MA-4 ၁ လက်၊ MA-15 ၁ လက်အပြင် ခဲယမ်းတချို့နဲ့ စစ်အသုံးအဆောင်ပစ္စည်းလည်း သိမ်းဆည်းရမိတယ်လို့ ဆိုပါတယ်။
ပြီးခဲ့တဲ့ ဇန်နဝါရီ ၁၃ ရက်နဲ့ ၁၄ ရက်မှာလည်း အမ်းကနေ ထွက်ပြေးလာတဲ့ စစ်တပ်နဲ့ ACDF တိုက်ပွဲ ဖြစ်ပွားခဲ့ပြီး စစ်တပ်ဘက်မှ ၅ ဦး သေဆုံးပြီးတော့ ၁၂ ဦးကို အရှင်ဖမ်းမိခဲ့ပါတယ်။
အလားတူ ဇန်နဝါရီ ၁၉ ရက်ကလည်း ငဖဲမြို့နယ် အမ်း-ပဒါန်းလမ်းပိုင်းတစ်နေရာမှာ စခန်းစွန့်ခွာပြီး ထွက်ပြေးလာတဲ့ စစ်သား ၁၅ ဦးကို အရှိုချင်း CDF က တိုက်ခိုက်ရာ ၃ ဦး သေဆုံးခဲ့ပါတယ်။
