ခိုင်လေး၊ ဇန်နဝါရီ ၂၇ ရက်၊ မိုင်းမော
“ဝ”ပြည် သွေးစည်းညီညွတ်ရေး တပ်မတော်- UWSA ထိန်းချုပ်နယ်မြေ မိုင်းမောမြို့နယ် ပန်ဝိုင်ကျေးရွာမှာ အသက် ၃၀ ဝန်းကျင်ရှိတဲ့ အမျိုးသားတစ်ဦးက ဆေးကြောင်ပြီး ဖခင်ဖြစ်သူကို ဓားနဲ့ ခုတ်သတ်ခဲ့ပါတယ်။
ဆေးကြောင်ပြီး ဖခင်ဖြစ်သူကို ဓားနဲ့ အပိုင်းပိုင်း ခုတ်သတ်ခဲ့တဲ့ ချိန်ညီရုန်းကို “ဝ”ပြည် တရားရေးဌာနက သေဒဏ် ချမှတ်ခဲ့ကြောင်း WSTV (Wa State TV)မှာ ပြီးခဲ့တဲ့ ဇန်နဝါရီ ၂၃ ရက်က ထုတ်ပြန်လာပါတယ်။
ဖခင်ကို သေစေတဲ့အထိ ကိုယ်ထိလက်ရောက် ကျူးလွန်ခဲ့တာကြောင့် သေဒဏ် ချမှတ်ခဲ့တာလို့ ဖြစ်စဥ်သိရှိသူ ဒေသခံတစ်ဦးက ရွှေဖီမြေကို ပြောပါတယ်။
“သားဖြစ်သူက နွားတွေကို ဒီအတိုင်း လွှတ်ထားပြီး ခြံရှင်းေနတာ။ သူ့အဖေကလည်း ဘာလို့ နွားေတွကို လျှောက်လွှတ်ထားတာလဲ။ အဝေးကြီး ရောက်ကုန်မှာပေါ့။ သေချာလဲ မကြည့်ဘူး နေ့တိုင်း မူးရူးနေတယ်ပေါ့။ သားဖြစ်သူကလည်း ဆေးတွေ စားထားတာ ဆေးအရှိန်နဲ့ ကြောင်နေတဲ့အချိန် သူ့အဖေရဲ့ခေါင်းကို ဓားနဲ့ ၄ ချက်လောက် ခုတ်ပစ်လိုက်တာပဲ။ သူလည်း သတိပြန်လည်လာတော့ သူ့အဖေလည်း ဆုံးနေပြီ”
ကျူးလွန်သူ ချိန်ညီရုန်းဟာ သတိပြန်ဝင်လာတာနဲ့ မိခင်ဖြစ်သူကို လူသတ်မိကြောင်း အသိပေးခဲ့ကာ သက်ဆိုင်ရာ ရပ်ကွက်လူကြီးကတဆင့် မြို့နယ် ရဲဌာနကို အကြောင်းကြားကာ ဖမ်းဆီးစေခဲ့တယ်လို့ ၎င်းက ဆက်ပြောပါတယ်။
ပြီးခဲ့တဲ့ ဩဂုတ် ၃ ရက်ကလည်း ကုန်စုံဆိုင် တစ်ခုမှာ ဓားပြတိုက်မှု ဖြစ်ပွားခဲ့ကာ ၈ နှစ်အရွယ် ကလေးငယ် သေဆုံးခဲ့ပြီး ပြစ်မှုကျူးလွန်သူကို ၂ လအကြာမှာ ဖမ်းဆီးရမိပြီးနောက် “ဝ”ပြည် ပြည်သူ့အစိုးရက တရားစီရင်ရေးဌာနက သေဒဏ် ချမှတ်ခဲ့ဖူးပါတယ်။
