ရွှေဖီမြေ၊ မေလ ၁၆ ရက်
အမျိုးသားအများစု အသုံးပြုနေကြတဲ့ တောင်ကြာပန်းအပါအဝင် အမျိုးသားအားတိုးဆေး ၆ မျိုးဟာ အနောက်တိုင်းဆေးတွေနဲ့ ရောနှောထားပြီး စံချိန်မညီတဲ့ တိုင်းရင်းဆေးဝါး ဖြစ်တာကြောင့် သုံးစွဲဖို့ မသင့်လျော်ကြောင်း စစ်ကောင်စီရဲ့ ကျန်းမာရေးဝန်ကြီးဌာနက ထုတ်ပြန်လာပါတယ်။
အဲဒီ အမျိုးသား အားတိုးဆေး ၆ မျိုးဟာ တောင်ကြာပန်း၊ ဆင်ပြောင်ကြီး၊ နတ်စည်းစိမ်၊ ဘီလူးငါးကောင် အမျိုးသားအားတိုးဆေးပြား၊ ဇော်ဂျီလက်စွဲ အကြောအားတိုးဆေးနဲ့ Double X အမျိုးသားအားတိုးဆေးတောင့်ဖြစ်တယ်လို့ ဆိုပါတယ်။
အဲဒီဆေးတွေဟာ တိုင်းရင်းဆေးဝါးမှတ်ပုံတင်နဲ့ တိုင်းရင်းဆေးဝါး ထုတ်လုပ်ခွင့်လိုင်စင် ရရှိထားပေမဲ့ ဈေးကွက်မှာ တိုင်းရင်းဆေးဝါး မှတ်ပုံတင်ခဲ့စဉ်က ဖော်ပြထားတဲ့ ဆေးဖော်စပ်နည်းနဲ့အညီ မဟုတ်ဘဲ ဖော်စပ်ထားတဲ့ တိုင်းရင်းဆေးဝါးဖြစ်ခြင်း၊ ဓာတ်ခွဲစစ်ဆေးစမ်းသပ်ချက်အရ အနောက်တိုင်းဆေးတွေ ရောနှောပါဝင်ခြင်း၊ သတ်မှတ်ချက် ၁ဝ ချက် ပြည့်စုံမှန်ကန်မှု မရှိခြင်းနဲ့ ဆေးတွေထဲက အချို့ဆေးဟာ မှတ်ပုံတင်ထားခြင်း မရှိသလို အနောက်တိုင်းဆေးနဲ့ ရောနှောထားကြောင်း စစ်ဆေးတွေ့ရှိခဲ့တယ်လို့ ဆိုပါတယ်။
ဒါကြောင့် အဲဒီဆေးတွေဟာ စစ်မှန်အစွမ်းထက်မှုကို အာမခံချက် မပေးနိုင်သလို အများပြည်သူ သုံးစွဲဖို့ မသင့်ကြောင်းနဲ့ ဈေးကွက်မှာ တင်သွင်းဖြန့်ဖြူးရောင်းချတာတွေကို လုံးဝ မလုပ်ဖို့၊ လိုက်နာဆောင်ရွက်ခြင်း မရှိရင် အရေးယူမယ်လို့ ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
