အလင်း၊ မေလ ၁၃ ရက်၊ မင်းတပ်
စစ်အုပ်ချုပ်ရေး ကြေညာထားတဲ့ မင်းတပ်မြို့ကို စစ်ကောင်စီတပ်က နှစ်ရက်ဆက်တိုက် လေကြောင်းကနေ ဗုံးကြဲတိုက်ခိုက်ပြီး စစ်သုံ့ပန်းအပါအဝင် ၄ ဦးသေဆုံးကာ နေအိမ်၊ အဆောက်အဦးများစွာ ပျက်စီးခဲ့တယ်လို့ ဒေသခံတွေဆီက သိရပါတယ်။
မင်းတပ်မြို့ကို စစ်ကောင်စီတပ်က မေလ ၁၁ ရက်၊ ည ၁၁ နာရီ ၄၅ မိနစ်မှစတင်၍ တံတားဦး လေတပ်မှ တက်လာတဲ့ ဂျက်ဖိုက်တာတစ်စီးနဲ့ နှစ်ကြိမ် ဗုံးကြဲတိုက်ခိုက်ခဲ့ပါတယ်။
အလားတူ မနေ့ မေလ ၁၂ ရက်၊ မနက် ၈ နာရီမှာ နှစ်ကြိမ်၊ မနက် ၁၁ နာရီမှာ နှစ်ကြိမ်၊ ညနေ ၆ နာရီ ၃၀ မိနစ်မှာလည်း ၅ ကြိမ် တိုင်တိုင် ဗုံးကြဲတိုက်ခိုက်ခဲ့ပါတယ်။
အဲဒီလေကြောင်း ဗုံးကြဲတိုက်ခိုက်မှုတွေကြောင့် စစ်သုံ့ပန်းအပါအဝင် ၄ ဦး သေဆုံးခဲ့ပါတယ်။
“ဗုံးကြဲတာက နှစ်ရက်ဆက်တိုက် ပြုလုပ်သွားတာပါ။ အဆောက်အဦးတွေကို အဓိက ပစ်မှတ်ထား တိုက်ခိုက်တာဖြစ်ပါတယ်။ အဆောက်အဦးတွေထဲမှာ စစ်သုံ့ပန်းတွေ ရှိပုံရတယ်။ အဲလေကြောင်းတိုက်ခိုက်ခံရတဲ့ထဲမှာ စစ်သုံ့ပန်းတွေ သေဆုံးတယ်လို့ ကြားရတယ်။” လို့ မင်းတပ်မြို့နယ်ဒေသခံတစ်ဦးက ရွှေဖီမြေသို့ ပြောပါတယ်။
ဒါ့အပြင် လေကြောင်း ဗုံးကြဲတိုက်မှုကြောင့် မင်းတပ်မြို့ရှိ အရပ်သား လူနေအိမ် ၁၅ လုံးခန့်၊ အစိုးရရုံးဌာန အဆောက်အအုံ ၁၀ ခု၊ အရပ်သားပိုင် ကားအပါအဝင် မော်တော်ယာဉ် ၄ စီးတို့လည်း ဗုံးထိမှန်ပျက်စီးခဲ့တယ်လို့ သိရပါတယ်။
“မြို့ထဲက ဌာနဆိုင်ရာ ရုံးအဆောက်အဦးတွေကို ဗုံးကြဲတယ်။ အဆောက်အဦးတွေအပြင် အနီးအနားမှာရှိတဲ့ အရပ်သားတွေ နေအိမ်တွေလည်း ဗုံးစထိမှန် ပျက်စီးသွားတယ်။ အိမ်မှာ ရပ်ထားတဲ့ အိမ်စီးကားတွေလည်း ပါတယ်။” လို့ အထက်ပါ မင်းတပ်မြို့နယ်ဒေသခံတစ်ဦးက ရွှေဖီမြေသို့ ပြောပါတယ်။
စစ်ကောင်စီရဲ့ လေကြောင်းရန်အန္တရာယ် စိုးရိမ်ရတဲ့ အခြေအနေကြောင့် ပြည်သူများအနေနဲ့ လူစုလူဝေးပြုလုပ်တာကို ရှောင်ကြဉ်ဖို့နဲ့ နေအိမ်တွေမှာ ဗုံးခိုကျင်းတွေ အဆင်သင့်ပြင်ဆင်ထားရှိကြဖို့ ချင်းပြည်သူ့အစည်းအရုံး၊ ချင်းပြည်သူ့တပ်မတော် (CPU/CPA) က မနေ့ မေလ ၁၂ ရက်နေ့က ထုတ်ပြန်ပါတယ်။
ဒါ့အပြင် ကင်းထောက်ဒရုန်းနဲ့ လေကြောင်းသတင်းတွေကို အမြဲမပြတ် နားစွင့်ပြီး အထူးသတိပြု နေထိုင်ကြဖို့ CUP/CPA က အသိပေးထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
