ဆျှိုည်ဖီမျေ၊ ကျံရ်မေ ဆငည်း 13၊ မာဝ်းႎံင်း
တံပ်ဆီုက်ဆျှံမ် SSPP ကဲ ပ္လိူရ်ႈလေႈခည်ကျံရ်မေ ဆငည်း 12ဒိူန်ဒါႈ ယိူဝ်ႇတမိုႈကောန်အီမာည်း ရဝ်ပါင်ဟည့် ခမိုးနားအည့်ခဲန့် လှံင်မာဝ်းႎံင်း ကပီုန်ဆျှံမ်ကဒါႇပိူည်နီန်အူအီး ယာႈတိူရ်ႈပ္လေလာက်နာက် (RPG) နီန်အူပိုင်း စီပဲန်အ်ုန်ပဒူႈဖါ်ႈ လယံမ်းဟာဝ်းပွံတ်ကောန်အီမာည်းဒီန်အောႏ။
ကောန်အီမာည်းဒီန် အ်ုန်ယိူဝ်းဖါ်ႈ ဂြိုခြီုင်လာက်နာက်ဆီုက်အီကီုက် အ်ုန်အီညှံမ်ပဒူႈနီန် ရီမ်းပြောလိုင်းအ်ုန် ခည်ကျံရ်မေဆငည်း 11 စူန်မှိူဝ်ကပံတ် 6နြီဒိူန် အ်ုန်စီတိူဝ်ႈႎီရ်ယာႈလာ်တိူရ်ႈ ပဂါင်ကဲ ဂေါႇမိုႈပ္လေဒီန် ဟည်ပဒူႈဟာဝ်း စီပဲန်အ်ုန်မာ်ယံမ်းဟာဝ်းပွံတ်ဒီဒီန် အူစာ်န်းအောႏ။
ကဲပ္လိူရ်ႈအူန်း ခေဲင်ပ္လါႇဘေဲႇ ပ်ုန်ရိူရ်ႈအူန်းကဲဒီန်ဒါႈ ကောန်အီမာည်း ကဝ်အီယံမ်းဟာဝ်းဒီန် အ်ုန်မိုႈ စိုင်းထွန်းဟန် ဘိူန်းအဆာက် 33ဆန်ုမ် ဂေါႇမိုႈဆိင်ပ္လေဒီန် လဟာဝ်းအ်ုန် စီပဲန် ဆဲႈဒါႇလကတ်ုတ်ဟာဝ်း ဇိူင်အ်ုန်ကာည်း တည်းအ်ုန်ကဒါႇလံပ်ဝဲ တငါည်အ်ုန်မာ် ဘိူန်းဟာဝ်းဒီဆဲဝ်အောႏ။
ဂေါႇဘည်ဒီန် စီပဲန်ဖုင် SSPP ကဲ ပ္လူႈအူန်းဆဒိဒါႈ ကဆီုဝ်ကူန်ရဝ်မာဂါင်ကဲ ဆာ်ယိူဝ်းဂြိုခြီုင်လာက်နာက်ဆီုက် အီကီုက်ကဲနီန် မည်ဘား၊ မည်တိူဝ်ႈဟာဝ်း၊ မည်ယာႈတိူရ်ႈ ဒဲႈပဲဟာဝ်းပ္လူႈဆဒိ ဖုင်ကပါင်းအီကဆီုဝ်ကဆဲင်ကဲ ချာ်န်းချာ်န်းအောႏ။
ကဲပ္လိူရ်ႈအူန်းဒါႈ ဘံန်ဟောည်ႇလံပ်တီုက်နာန်း 1027 ခေဲင်လှံင်မာဝ်းႎံင်းနီန် တောန်တံပ်ဆီုက်ဆျှံမ် SSPP/SSA ကဲ ရေဲန်ပါင်ကတူႈကငျားတောပ် ကူန်ရဝ်မာဂါင်ကဲ ကဲပ္လူႈဟာဝ်းဆဒိ ခြဲဘည်မိုႈဖေးရာန်မဴင်နီန် တတိုအီးခေဲင်အရာပ်ကဲ ဟည်မိုႈ 10လိူဝ်ႈ အာဝ်ယောမ်ယာ့်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
