ရွှေဖီမြေ၊ ဇန်နဝါရီ ၂၇ ရက်
စစ်ကောင်စီတပ်ရဲ့ လက်ချက်ကြောင့် ၂၀၂၄ ခုနှစ်အတွင်း မြန်မာနိုင်ငံတစ်ဝှမ်းက အမျိုးသမီး ၄၇၈ ဦး သေဆုံးခဲ့ပြီး ၄၁၂ ဦး ထိခိုက်ဒဏ်ရာ ရခဲ့တယ်လို့ မြန်မာ့အမျိုးသမီးသမဂ္ဂ- BWU က ပြီးခဲ့တဲ့ ဇန်နဝါရီ ၂၀ ရက်မှာ ထုတ်ပြန်ထားပါတယ်။
၎င်းအမျိုးသမီးတွေဟာ စစ်တပ်ရဲ့ စစ်ရာဇဝတ်မှုနဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှုအပါအဝင် လူ့အခွင့်အရေး ချိုးဖောက်မှုကိုလည်း နည်းမျိုးစုံ ခံစားခဲ့ကြရတယ်လို့ ဆိုပါတယ်။
လေကြောင်း ဗုံးကြဲမှုကြောင့် ၂၅၇ ဦး သေဆုံးကာ ၁၉၁ ဦး ဒဏ်ရာရတာအပြင် လက်နက်ကြီး ပစ်ခတ်မှုကြောင့် ၁၄၃ ဦး သေဆုံးခဲ့ပြီး ၁၅၂ ဦး ဒဏ်ရာရကာ မတရား သတ်ဖြတ်မှုကြောင့် ၆၆ ဦး သေဆုံးခဲ့ပြီး ၁၀ ဦး ဒဏ်ရာရတာ၊ မြေမြှုပ်မိုင်းကြောင့် ၇ ဦး သေဆုံးတာနဲ့ ၄၂ ဦး ဒဏ်ရာ ရခဲ့ကြောင်း ဖော်ပြထားပါတယ်။
လိင်ပိုင်းဆိုင်ရာ အကြမ်းဖက်မှုကြောင့် ၆ ဦး ေသဆံုးခဲ့ပြီး ၁၂ ဦး ဒဏ်ရာရကာ အကျဉ်းထောင်မှာ နှိပ်စက်မှုကြောင့် ၅ ဦး ဒဏ်ရာရတာအပြင် MNDAA ရဲ့ သေဒဏ် ပေးမှုကြောင့် ၁ ဦး သေဆုံးခဲ့တာ ဖြစ်ပါတယ်။
၎င်းအမျိုးသမီးတွေဟာ စစ်ကိုင်းတိုင်းက ၁၀၉ ဦး၊ ရှမ်းပြည်နယ်မှ ၉၂ ဦး၊ ရခိုင်ပြည်နယ်မှ ၈၃ ဦး၊ မန္တလေးတိုင်းမှ ၆၇ ဦး ဖြစ်ပါတယ်။
ဒီအချက်အလက်တွေဟာ တိကျခိုင်လုံတဲ့ သတင်းမီဒီယာ အချက်အလက်နဲ့ မြေပြင်ကနေရတဲ့ အချက်အလက်ေတွကို စုဆောင်းမှတ်တမ်းတင်ထားတာ ဖြစ်တယ်လို့ ဆိုပါတယ်။
လက်တွေ့မြေပြင် အခြေအနေကြောင့် သတင်းအချက်အလက်တွေကို လက်လှမ်းမှီဖို့ အခက်အခဲ ရှိနေပြီး မြေပြင်မှာ ဒီထက် ပိုများနိုင်တယ်လို့ ဆိုပါတယ်။
