ရွှေဖီမြေ၊ မေလ ၉ ရက်၊ နမ္မတူ
တအာင်းတပ်မတော် ထိန်းချုပ်ထားတဲ့ ရှမ်းမြောက် နမ္မတူမြို့ထဲ ကားဘရိတ် ပေါက်ရာကနေ မတော်တဆမှုဖြစ်လို့ ဒေသခံ အမျိုးသားတစ်ဦး သေဆုံးပြီး ၅ ဦး ဒဏ်ရာ ရခဲ့ပါတယ်။
ဒီနေ့ မေလ ၉ ရက် နေ့လယ် ၂ နာရီခွဲဝန်းကျင်မှာ နမ္မတူမြို့ မြို့မဈေးအနီးမှာ မြေတင်ကားတစ်စီး ဘရိတ်ပေါက်ရာကနေ မောချယ်ရီတည်းခိုခန်းအနီးရှိ နေအိမ်တစ်အိမ်ကို ဝင်တိုက်မိခဲ့တယ်လို့ မျက်မြင်တွေ့ရှိခဲ့တဲ့ ဒေသခံ အမျိုးသမီးတစ်ဦးက ပြောပါတယ်။
“အပေါ်ကနေ ဆင်းလာတာ။ ကားက ဘရိတ်ပေါက်ပြီးသား။ အော်တယ် သူက အော်တယ်။ သူမထိန်းနိုင်ဘူး အဝေးကနေ အော်လာတယ်။ ဒီနားမှာ အများကြီး ထိုင်ကြတာ ကယ်ရီသမားတွေ။ ဦးဂျဘား(သေဆုံးသူ)က အသက်ကြီးတော့ သူမပြေးနိုင်ဘူးလေ။ သူမလွတ်သွားဘူး။ ကားနဲ့ပါသွားပြီလေ”
ယာဉ်မတော်တဆမှုကြောင့် ဦးဂျဘားဆိုသူ သေဆုံးခဲ့ပြီး ယာဉ်မောင်းအပါအဝင် TNLA တပ်သား ၃ ဦးနဲ့ ဒေသခံ အမျိုးသား ၂ ဦး စုစုပေါင်း ၅ ဦး ထိခိုက်ဒဏ်ရာ ရခဲ့ပါတယ်။
လက်ရှိမှာတော့ ဒဏ်ရာရသူတွေကို နမ္မတူ ပြည်သူ့ဆေးရုံမှာ ကုသမှု ခံယူနိုင်ဖို့ ပို့ဆောင်ပေးထားတယ်လို့ သိရပါတယ်။
အလားတူ ပြီးခဲ့တဲ့ ဧပြီ ၂၃ ရက် ညနေ ၄ နာရီခွဲကလည်း နမ့်ခမ်းမြို့နယ် ကွန်လုံရွာမှာ လယ်ထွန်စက်တစ်စီးနဲ့ စက်ဘီး တိုက်မိပြီး အသက် ၆ နှစ်အရွယ် ကလေးငယ်တစ်ဦး သေဆုံးခဲ့ဖူးပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
