လွေးထွေး၊ ဇန်နဝါရီ ၂၅ ရက်
မွန်ပြည်နယ် ကျိုက်ထိုမြို့နယ် ငှက်ပျောတောကျေးရွာကို စစ်ကောင်စီတပ်က လက်နက်ကြီး ပစ်ခတ်လို့ အမျိုးသမီးတစ်ဦး ပွဲချင်းပြီး သေဆုံးခဲ့ပြီးတော့ ၃ ဦး ဒဏ်ရာ ရခဲ့တယ်လို့ KNU က မနေ့ ဇန်နဝါရီ ၂၅ ရက်မှာ ထုတ်ပြန်လာပါတယ်။
စစ်ကောင်စီရဲ့ အမှတ် ၆၀၂ အမြှောက်တပ်ရင်းစခန်းကနေ ဇန်နဝါရီ ၂၁ ရက် ည ၇ နာရီခန့်မှာ ငှက်ပျောတောရွာထဲ လက်နက်ကြီး ၃ လုံး ပစ်ခတ်ခဲ့လို့ ဒေသခံအမျိုးသမီးတစ်ဦး သေဆုံးခဲ့သလို အမျိုးသမီး ၃ ဦးလည်း ထိခိုက်ဒဏ်ရာ ရခဲ့ပါတယ်။
KNU ရဲ့ ပြောရေးဆိုခွင့်ရှိသူ ပဒိုစောတောနီးက “စစ်တပ်က စစ်ရေးဘက်ဆို ဘယ်လိုမှ သူတို့မယှဉ်နိုင်တော့ဘူး။ နယ်မြေထဲဆို စစ်ကြောင်း မလှည့်နိုင်တော့ဘူး။ သူ့နေရာလေးဘဲ ကုတ်ပြီး နေ နေရတာ။ အဲနေရာကနေဘဲ လူထု ရှိရာဘက်ကို လက်နက်ကြီးတွေ ပစ်တာတွေဘဲ လုပ်နိုင်တော့တယ်” လို့ ရွှေဖီမြေကို ပြောပါတယ်။
လူထိခိုက်သေဆုံးတာအပြင် နေအိမ် ၃ လုံးလည်း ထိမှန်ပျက်စီးခဲ့ပြီး ကားတစ်စီး ပျက်စီးခဲ့တယ်လို့ ဆိုပါတယ်။
အလားတူ ပြီးခဲ့တဲ့ ဇန်နဝါရီ ၂၂ ရက်ကလည်း ကရင်ပြည်နယ် ကျိုက်ဒုံမြို့ကို စစ်တပ်က ဗုံးကြဲတိုက်ခိုက်ခဲ့တာကြောင့် အမျိုးသမီးတစ်ဦး သေဆုံးခဲ့ပြီး နေအိမ်တချို့လည်း ထိမှန်ပျက်စီးခဲ့ပါတယ်။
ပြီးခဲ့တဲ့ ဇန်နဝါရီ ၂၁ ရက် နေ့လယ် ၃ နာရီကလည်း KNU ထိန်းချုပ်နယ်မြေဖြစ်တဲ့ ညောင်လေးပင်မြို့နယ်ကို စစ်တပ်က ဒရုန်းဗုံးကြဲလို့ ဦးဇင်းတစ်ပါး ပျံလွန်တော်မူပြီး ဦးဇင်းတစ်ပါးနဲ့ ဒေသခံ ၁ ဦး ဒဏ်ရာ ရခဲ့ပါတယ်။
