ဆုမွန်၊ မေလ ၂ ရက်
ကိုးကန့်တပ်မတော်-MNDAA နဲ့ “ဝ” ပြည် သွေးစည်းညီညွတ်ရေးတပ်မတော်- UWSAတို့ ထိန်းချုပ်ထားတဲ့ ဒေသမှာ တရုတ်က မြန်မာပိုင်နက်ထဲ ကျူးကျော်လာပြီး ခြံစည်းရိုးအသစ် တည်ဆောက်နေကြောင်း ဖြစ်စဉ်သိရှိသူအမျိုးသမီးတစ်ဦးက ပြောပါတယ်။
“သူတို့လုပ်တာ မကြာသေးဘူး။ ၁ လ ၂လလောက်ပဲရှိမယ်။ခြံစည်းရိုးအဟောင်းကို သူတို့မဖြတ်ဘူး။ အမတို့မြင်တွေ့နေရတာက အဆင့် ၃ ဆင့်ပြန်လုပ်ထားတယ်။ ပထမခြံစည်းရိုးက အသစ်တိုးချဲ့ပြီး အနောက်မှာ အုတ်တံတိုင်း ပေအမြင့်ကြီးပဲ လူတစ်ရပ်စာလောက်ရှိတယ်။ အုတ်တံတိုင်းအမြင့်ကြီးပဲ။ ပြီးမှ အထဲမှာ မူလခြံစည်းရိုးရှိတယ်။ အဲဒီမူလခြံစည်းရိုးကလည်း သူတို့မဖြတ်ဘူး။ တကယ်လို့ သူတို့ခြံစည်းရိုးခံမဲ့နေရာတွေ နယ်မြေယူမယ့်နေရာတွေဆို တရုတ်တွေက သူတို့အလံစိုက်ထားတယ်”
တရုတ်ဘက်က နယ်စပ်ခြံစည်းရိုးအသစ် ကျုးကျော်လာတဲ့ နေရာတွေဟာ MNDAA ထိန်းချုပ်ထားတဲ့ ချင်းရွှေဟော်၊ ကြူကုတ် (ပန်ဆိုင်း)၊ ရွှေလီနဲ့ UWSA ထိန်းချုပ်ထားတဲ့ နမ့်တစ် (မန်ခါး) တို့ ဖြစ်ပြီး ကိုးကန့်တပ်ထိန်းချုပ်နေရာမှာ တရုတ်က အများဆုံး ကျူးကျော်ဆောက်လုပ်နေတာ ဖြစ်တယ်လို့ ဆိုပါတယ်။
ဒါ့အပြင် UWSA ထိန်းချုပ်ထားတဲ့ နမ့်တစ် (မန်ခါး) ဂိတ်ဘက်တွေဘက်မှာလည်း အရင်နေရာထက်ကျော်လာပြီး ခြံစည်းရိုးအသစ်ဆောက်လုပ်ထားတယ်လို့ အဆိုပါအမျိုးသမီးက ပြောပါတယ်။
အဆိုပါ တရုတ်ဘက်က မြန်မာပိုင်နက်ထဲကို ကျူးကျော်လာပြီး ခြံစည်းရိုးအသစ် တည်ဆောက်ခဲ့ပေမဲ့ ကိုးကန့်တပ်ဖွဲ့နဲ့ “ဝ” တပ်ဖွဲ့တို့က တစ်စုံတစ်ရာ ထုတ်ပြန်ပြောဆိုထားတာမျိုး မရှိဘူးလို့ ဆိုပါတယ်။
လက်ရှိ တရုတ်ဘက်က ခြံစည်းရိုးကျူးကျော် ဆက်တိုက်တည်ဆောက်နေတာတွေကို လူမှုကွန်ရက်ကနေတစ်ဆင့်လည်း ဒေသခံတွေ ဖြန့်ဝေနေကြပေမယ့် တစ်စုံတစ်ရာတုံ့ပြန်ရဲကြခြင်း မရှိပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
