ရွှေဖီမြေ၊ မေလ ၁ ရက်
တစ်နေ့သာ အခြေခံလုပ်အားခအတွက် အနိမ့်ဆုံး ၂ သောင်းကျပ်ပေးဖို့ ဒီနေ့ မေလ ၁ ရက်နေ့မှာ ကျရောက်တဲ့ ၁၃၆ ကြိမ်မြောက် ကမ္ဘာ့အလုပ်သမားနေ့မှာ မြန်မာနိုင်ငံအထွေထွေအလုပ်သမားအဖွဲ့ချုပ် ( FGWM) က အလုပ်ရှင်တွေထံ ထုတ်ပြန်တောင်းဆိုထားပါတယ်။
အလုပ်ရှင်တွေအနေနဲ့ တနေ့အလုပ်ချိန် ၈ နာရီအတွက် (အချိန်ပိုအလုပ်မပါ) လုပ်ခလစာ အနည်းဆုံး အခကြေးငွေ ၂ သောင်းကျပ် ပေးဖို့၊ လုပ်ငန်းခွင်အတွင်း လုံလောက်တဲ့ ကျန်းမာရေးစောင့်ရှောက်မှုပေးဖို့၊ ဘေးကင်းလုံခြုံတဲ့ အစီအမံတွေ လုပ်ဆောင်ပေးဖို့၊ အတင်းအဓမ္မ အလုပ်ခိုင်းစေတာတွေ မလုပ်ဖို့၊ နိုင်ငံခြားသား တိုက်ရိုက်ခိုင်းစေတာ မလုပ်ဖို့၊ ကိုယ်ထိလက်ရောက် ရိုက်နှက်တာတွေ ချက်ချင်းရပ်တန့်ဖို့၊ အမျိုးသမီး လုပ်သားတွေအတွက် လစဉ်သုံးပစ္စည်းတွေ အခမဲ့ ထောက်ပံ့ပေးဖို့နဲ့ အမျိုးသမီးလုပ်သားတွေ ကိုယ်ဝန်ဆောင်စဉ်နဲ့ ရာသီသွေးလာနေစဉ် စံချိန်သတ်မှတ်ချက်တွေနဲ့ မခိုင်းဖို့ ပါဝင်ပါတယ်။
ဒါ့အပြင် စက်ရုံ အလုပ်ရုံလုပ်ငန်းတွေမှာ တရုတ်(အိမ်ထောင်ဖက်)အဖြစ် အမျိုးသမီးလုပ်သားတွေကို ငွေကြေးမတ်လုံးပြ၊ နည်းလမ်းပေါင်းစုံနဲ့ သွေးဆောင်ဖျားယောင်းတာတွေ ချက်ချင်းရပ်တန့်ဖို့၊ အလုပ်သမားတွေကို ကိုယ်စားမပြုတဲ့ အတုအယောင် အလုပ်သမားအဖွဲ့အစည်း (Yellow Unions) ဖွဲ့စည်းတာတွေ မလုပ်ဖို့၊ အလုပ်သမားသမဂ္ဂတွေကို အာဏာရှင်လက်ကိုင်တုတ် အလုပ်သမားဝန်ကြီးဌာနမှာ အဓမ္မဖိအားပေး မှတ်ပုံတင်ခိုင်းတာနဲ့ အလုပ်သမားခေါင်းဆောင်တွေရဲ့ ကိုယ်ရေးအချက်အလက်တွေကို ယူတာတွေ ရပ်တန့်ပေးဖို့လည်း တောင်းဆိုထားပါတယ်။
နိုင်ငံတကာ ကုန်အမှတ်တံဆိပ်တွေအနေနဲ့လည်း စက်ရုံအလုပ်ရုံ လုပ်ငန်းရှင်တွေရဲ့ လုပ်ငန်းခွင်ချိုးဖောက်မှုတွေအပေါ် ထိထိရောက်ရောက် တာဝန်ယူပေးဖို့နဲ့ အလုပ်သမားတွေကို (အချိန်ပိုအလုပ်မပါ) တနေ့အလုပ်ချိန် ၈ နာရီအတွက် လုပ်ခလစာ အနည်းဆုံး အခကြေးငွေ ၂ သောင်းကျပ် ရရှိဖို့အတွက် ပူးပေါင်းပါဝင်ပေးဖို့လည်း တောင်းဆိုထားပါတယ်။
စက်မှုဇုန်အလုပ်သမားတွေနဲ့ နေရပ်ပြန် ရွှေ့ပြောင်းအလုပ်သမားတွေကို အဓမ္မစစ်မှုထမ်းစာရင်းသွင်း ပေါ်တာဆွဲတာတွေ ရပ်တန့်ဖို့ စစ်အာဏာရှင်ကို ဖိအားပေးဖို့၊ ပြည်တွင်းပြည်ပ ရွှေ့ပြောင်းလုပ်သားတွေအနေနဲ့ အလုပ်သမားတွေကိုယ်တိုင် ဦးဆောင်တဲ့ လွတ်လပ်တဲ့ အလုပ်သမားသမဂ္ဂတွေ ဖွဲ့စည်းခွင့်ရှိဖို့၊ အလုပ်သမားဥပဒေတွေနဲ့အညီ ဘေးကင်းစွာ အလုပ်လုပ်ကိုင်ခွင့်ရရှိဖို့နဲ့ CDM ဝန်ထမ်းတွေကို အကူအညီပေးဖို့နဲ့ ပြည်သူ့ဝန်ထမ်းသမဂ္ဂတွေ အားကောင်းဖို့အတွက် ဝန်းရံပံ့ပိုးပေးဖို့ နိုင်ငံတကာ လူ့အခွင့်အရေးအဖွဲ့အစည်းတွေနဲ့ နိုင်ငံရေးအင်အားစုတွေကို တိုက်တွန်းတောင်းဆိုထားပါတယ်။
မြန်မာနိုင်ငံအထွေထွေ အလုပ်သမားသမဂ္ဂများ အဖွဲ့ချုပ်အနေနဲ့လည်း တိုင်းပြည်ဒီမိုကရေစီရရှိရေးနဲ့ လုပ်ငန်းခွင်အတွင်း အလုပ်သမားတွေကိုယ်တိုင် ဦးဆောင်တဲ့ အလုပ်သမားသမဂ္ဂတွေ စုဖွဲ့နိုင်ဖို့ ကြိုးပမ်းဆောင်ရွက်သွားမယ်လို့ ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
