ရွှေဖီမြေ၊ ဇန်နဝါရီ ၂၆ ရက်
အရပ်သားတွေ ဆေးကုနေတဲ့ တအာင်းတပ်- TNLA ထိန်းချုပ်ထားရာ ကျောက်မဲ ပြည်သူ့ဆေးရုံကို ဗုံးကြဲတိုက်ခိုက်တာကို ကန့်ကွက်ရှုတ်ချကြောင်း ကျန်းမာရေး မိသားစု မန္တလေး- MFM၊ တအာင်းပြည် ကျန်းမာရေးကောင်စီ- THC နဲ့ တခြားအဖွဲ့အစည်းတွေက ထုတ်ပြန်လာပါတယ်။
မနေ့ ဇန်နဝါရီ ၂၅ ရက် နေ့လယ် ၂ နာရီ ဝန်းကျင်မှာ အရပ်သားတွေ ဆေးကုနေတဲ့ ကျောက်မဲ ပြည်သူ့ဆေးရုံပေါ် ဗုံးကြဲတိုက်ခိုက်ခဲ့တာကြာင့် CDM ဆရာ ဆရာမ ၂ ဦးနဲ့ အရပ်သားတစ်ဦး သေဆုံးခဲ့တဲ့အပြင် အရပ်သား ၂၀ ကျော် ထိခိုက်ဒဏ်ရာ ရခဲ့ပါတယ်။
ထိခိုက်သေဆုံးခဲ့သူရဲ့ မိသားစုနဲ့အတူ MFM နဲ့ THC က ဝမ်းနည်းကြေကွဲကြောင်း၊ တော်လှန်ရေးအင်အားစု၊ CDM ကျန်းမာရေး ဝန်ထမ်းနဲ့ ဆက်လက် လက်တွဲပြီး စစ်အာရှင် အမြစ်ပြတ်ဖို့အတွက် တိုက်ပွဲဝင်သွားမယ်လို့လည်း ပြောဆိုထားပါတယ်။
ဒါ့အပြင် ကျောက်မဲ ပြည်သူ့ဆေးရုံကို ဗုံးကြဲတာဟာ စစ်တပ်က ဂျီနီဗာကွန်ဗန်းရှင်း၊ ကမ္ဘာ့ကုလသမဂ္ဂ လုံခြုံရေးကောင်စီ ဆုံးဖြတ်ချက်၊ လူသားချင်း စာနာထောက်ထားမှုနဲ့ လူ့အခွင့်အရေးဆိုင်ရာ နိုင်ငံတကာဥပဒေကို ပြောင်ပြောင်တင်းတင်း ချိုးဖောက်ပြီး ဆေးရုံဆေးခန်းနဲ့ ကျန်းမာရေးကဏ္ဍအပေါ် တမင်ပစ်မှတ်ထားကာ တိုက်ခိုက်တဲ့ စစ်ရာဇဝတ်မှုကို ထပ်မံ ကျူးလွန်တာလို့လည်း THC က ပြောပါတယ်။
အလားတူ အမျိုးသား ညီညွတ်ရေးအစိုးရ- NUG ရဲ့ ကျန်းမာရေးဝန်ကြီးဌာနကလည်း ဗုံးကြဲတိုက်ခိုက်မှုအပေါ် ကန့်ကွက်ရှုတ်ချကြောင်း ထုတ်ပြန်ထားသလို TNLA ကလည်း ကန့်ကွက်ကြောင်း ထုတ်ပြန်လာပါတယ်။
