ပျားကြီး၊ ဧပြီ ၂၈၊ ကျောက်ပန်းတောင်း
မန္တလေးတိုင်း၊ ကျောက်ပန်းတောင်းမြို့နယ်၊ ပုပ္ပါးဒေသမှာရှိတဲ့ ဆည်ပေါက်ချောင်းရေကြီးရေလျှံမှုကြောင့် မော်တော်ယာဥ်တစ်စီးရေစီးနဲ့မျောပါခဲ့ရပေမဲ့ ခရီးသည်တွေကိုတော့ ကူညီကယ်ဆယ်မှုတွေပြုလုပ်နိုင်ခဲ့တယ်လို့ ဒေသခံတွေကရွှေဖီမြေကိုအတည်ပြုပြောဆိုပါတယ်။
ပြီးခဲ့တဲ့ ဧပြီလ ၂၆ ရက် ညနေပိုင်းက ကျောက်ပန်းတောင်း – မြင်းခြံကားလမ်းပေါ်မှာရှိတဲ့ ဆည်ပေါက်ချောင်းဟာ မိုးသည်းထန်စွာရွာသွန်းမှုကြောင့် ၃ ပေကနေ ၅ ပေအထိရှိတဲ့ ရေလှိုင်းလုံးတွေစီးဆင်းခဲ့တဲ့အတွက် ချောင်းကိုဖြတ်ကူးဖို့ကြိုးစားနေတဲ့ မော်တော်ယာဥ်တစ်စီး ရေစီးနဲ့မျောပါသွားခဲ့ရတာဖြစ်ပါတယ်။
“ဒေသတွင်းသွားလာနေတဲ့ဈေးကားပါ။ သူလည်းရေတွေထဲကနေလွတ်မယ်ထင်လို့ ကူးလိုက်တာ။ ရေစီးအရမ်းသန်တော့အရှိန်နဲ့တွန်းချလိုက်သလိုဖြစ်သွားတာပဲ။ ကံကောင်းတာက ကားပေါ်မှာကုန်ပစ္စည်းတွေအပြည့်ပါတော့ ကားကအရမ်းအဝေးကြီးကိုရွေ့မသွားတာပဲ။ဒါတောင်အတော်လေးခက်ခက်ခဲခဲကယ်လိုက်ရတယ်”လို့ ကျောက်ပန်းတောင်းမြို့ခံပရဟိတအသင်းခေါင်းဆောင်တစ်ဦးကပြောပါတယ်။
ဆည်ပေါက်ချောင်းရေနဲ့အတူမျောပါသွားခဲ့တဲ့မော်တော်ယာဥ်ပေါ်မှာ ကလေးငယ် ၃ ဦး၊ အမျိုးသမီး ၁၁ ဦးနဲ့ အမျိုးသား ၅ ဦးတို့ဖြစ်ပြီး အားလုံးကို အချိန် တစ်နာရီကျော်ကြာခက်ခက်ခဲခဲကူညီကယ်ဆယ်မှုတွေပြုလုပ်ခဲ့ရတယ်လို့ မျက်မြင်တွေ့သူတွေက ဆိုပါတယ်။
ဆည်ပေါက်ချောင်းရေကြီးမှုကြောင့် ကျောက်ပန်းတောင်း – မြင်းခြံကားလမ်းမကို မော်တော်ယာဥ်များဖြတ်သန်းသွားလာဖို့ ၁၂ နာရီကျော်ကြာစောင့်ဆိုင်းခဲ့ရပြီး မနေ့ မနက်ပိုင်းကျမှပရဟိတအသင်းတွေရဲ့အကူအညီနဲ့ ဖြတ်သန်းသွားလာမှုတွေပြုလုပ်နိုင်ခဲ့တယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
