ဝတ်ရည်၊ ဧပြီ ၂၃ ရက်၊ လက်ပံတန်း
ပဲခူးတိုင်း လက်ပံတန်းမြို့နယ်မှာ လေကြောင်းကနေ ဗုံးကြဲတိုက်ခိုက်ခဲ့ရတာကြောင့် ဒေသခံ ၄ ဦး သေဆုံးခဲ့တယ်လို့ ဒီဖြစ်စဉ်ကို သိရှိထားသူ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဧပြီ ၂၂ ရက် မနက် ၁၁ နာရီခွဲဝန်းကျင်မှာ လက်ပံတန်းမြို့နယ် ဝန်ကလေး(ဆားချောင်း)ရွာအတွင်းကို စစ်ကောင်စီတပ်က ဂျက်ဖိုက်တာ ၂ စီးနဲ့ လေကြောင်းကနေ ဗုံးကြဲတိုက်ခိုက်ခဲ့တယ်လို့ ဆိုပါတယ်။
“ဂျက်နဲ့ ၁၀ လုံးမက လာကြဲသွားတာဗျ။ အဲရွာက ဝါးရုံပင်အုပ်စုထဲက ကျေးရွာပါဗျ။ တိုက်ပွဲဖြစ်ပွါးတဲ့ နေရာလည်း မဟုတ်ပါဘူး”လို့ အမျိုးသားတစ်ဦးက ပြောပါတယ်။
စစ်ကောင်စီတပ်ရဲ့ ဗုံးကြဲတိုက်ခိုက်မှု အသက် ၁၅ နှစ်အရွယ်အပါအဝင် ဒေသခံအမျိုးသား ၄ ဦးသေဆုံးခဲ့တဲ့အပြင် ထိမှန်ဒဏ်ရာရရှိသူ ၆ ဦးရှိပြီး နေအိမ် ၃ လုံးလည်း ပျက်စီးခဲ့ရတယ်လို့ လက်ပံတန်းမြို့နယ် ပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။
စစ်ကောင်စီတပ်က ဗုံးကြဲတိုက်ခိုက်ခဲ့တဲ့ ကျေးရွာမှာ တိုက်ပွဲဖြစ်ပွားတာမရှိတဲ့အပြင် တော်လှန်ရေးအင်အားစုတွေ နေထိုင်တာမျိုးလည်းမရှိဘူးလို့ ဆိုပါတယ်။
ဒေသခံတွေကို ပစ်မှတ်ထားပြီး လေကြောင်းတိုက်ခိုက်နေတာကြောင့် ဒေသခံတွေအနေနဲ့ လေကြောင်းအန္တရာယ် အထူးဂရုစိုက်သတိထားနေထိုင်ကြဖို့ကိုလည်း ထုတ်ပြန်ချက်ထဲ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
