ပိုႈလဘား၊ ကျံရ်အေပ်ြုရ် ဆငည်း 2၊ နော်င်ခေဝ်
ကောန်အီမာည်း ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းဒါႈ ကောန်အီပ်ုန်ကဝ်အီဂေါည်ရဝ်မတ်လွတ် လှံင်နော်င်ခေဝ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ႎီရ်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန်အူအီး ငျားဖါ်ႈညဲ့မဴင် ယံမ်းဟာဝ်းအောႏ။
ကောန်အီမာည်း ရကႎိုည်နီန် က္လာင်းဒါႈ ခည်ကျံရ်မာချှ် ဆငည်း 28ဒိူန် ယာသီတာမွေး ဘိူန်းအဆာက် 39ဆန်ုမ် အ်ုန်အီဂေါည်ပရဝ်မတ်လွတ်နီန် ယိူဝ်ႇတအ်ုန်ဟာဝ်းရေဲန် လံပ်ဆပဲဆငါး ရီမ်းပြောဒေင် အီဂေါည်ရအာည်ႇဂါင်ကဲဒီန် စီငျားလာ်ညဲ့ဟာဝ်းမဴင်ဒီန်အောႏ။
အ်ုန်ဒါႈ “အ်ုန်ရေဲန်လံပ်ဆပဲဆငါး ရီမ်းပြောဂါင်ကဲ။ အ်ုန်ငျားဒေဒါရကီႇညှိူဝ် ဟာဝ်းလမဴင်ဒီန်။ လဟာဝ်းငါည်အ်ုန်။ ဇိူင်အ်ုန်ကဒါႇတံမ်ကတ်ုတ်ဟာဝ်းဖါ်ႈ အ်ုန်မာ် ယံမ်းဟာဝ်းပွံတ်ဒီဒီန် အူစာ်မ်း”
ဘာည်းလိူည်ဒီန် ခည်ကျံရ်မာချှ် ဆငည်း 21 ခိင်ဆံန်ကပံတ် 2နြီဒိူန်မာ် ယိူဝ်ႇတမိုႈ တာတင်လှိူင် ဘိူန်းအဆာက် 57ဆန်ုမ်နီန် ဟာဝ်းတာင်ငါမ်းမာည်း ကဒါႇတော်င်ခံမ်း စီငျားလာ်ညဲ့မဴင် ဘိူန်းဟာဝ်းဒီဆဲဝ်အောႏ။
ဆဲႈဒါႇဒီန် ခည်ကျံရ်မာချှ် ဆငည်း 9 ခိင်ဆံန်ကပံတ် 2နြီဒိူန်မာ် ယိူဝ်ႇတမိုႈတာသာနီ ဘိူန်းအဆာက် 55ဆန်ုမ် အ်ုန်အီဂေါည်ပရဝ်နောင်လိပ်နီန် ဟာဝ်းက္လဟေခေဲင်ဘြည် အီကဒိုင်းတောပ်ရဝ်နောင်လိပ်ဒီန် 3မဴင် စီငျားဖါ်ႈညဲ့ဟာဝ်းမဴင် ဇိူင်အ်ုန်မာ် ကတ်ုတ်ဟာဝ်းပွံတ် ကဒါႇဝဲအောႏ။
တောပ်ဘည်စြာင်းပ်ုန်ကစုအူန်း ဖုင်ယဲဆျှိုည်ဖီမျေ ခေဲင်ဆန်ုမ် 2025နီန် အူဆန်ုမ် ဂေါႇမဴင်တီႇခေဲင်ကတာည်း တောပ်ပည်ကောန်ဒဲႇ 2အီး တိုအီးဟည်ယံမ်းဟာဝ်းဖါ်ႈ ခေဲင်ကပီုန်ဆျှံမ်ကဒါႇပိူည်နီန် 9အီး တောပ်ပည်ကောန်ဒဲႇ 6အီး တိုအီးဟည်ဘာတ်ဟာဝ်း 27အီးအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
