ဓာတ်ပုံ – SPM

ယာရူစိင်း၊ ဇန်နဝါရီ ၂၄ ရက်၊ လားရှိုး

ကိုးကန့်တပ်မတော်- MNDAA ထိန်းချုပ်ထားတဲ့ ရှမ်းမြောက် လာရှိုးမြို့နယ် ကောင်းကျဲအုပ်စုထဲရှိ ကျေးရွာတွေမှာ ရှမ်းပြည်တပ်မတော်- SSPP နဲ့ ကချင်တပ်မတော်- KIA က ဆန်နဲ့ငွေ တောင်းခံနေပြီး ဇန်နဝါရီလအတွင်း အပြီးပေးခိုင်းနေပါတယ်။

ကောင်းကျဲအုပ်စုထဲက အိမ်ခြေ ၂ဝဝ ခန့်ရှိတဲ့ ခါးချဉ်ရွာ၊ အိမ်ခြေ ၆ဝ ကျော်ရှိတဲ့ ကောင်းမတ်ကျန်းရွာ၊ အိမ်ခြေ ၈ဝ ကျော်ရှိတဲ့ နမ့်မော်ဂျင်ရွာ၊ ပန်ဝူးလျန်ရွာနဲ့ အိမ်ခြေ ၁ဝဝ ကျော်ရှိတဲ့ ညောင်ပင်သာရွာတွေမှာ ကောက်ခံနေတာပဲ ဖြစ်ပါတယ်။

မြေပြင်အခြေအနေသိရှိသူ အမျိုးသားတစ်ဦးက “တစ်ရွာနဲ့တစ်ရွာ မတူဘူး။ SSPP က ရွာတစ်ရွာကို ဆန်အိတ် ဘယ်လောက် ပေးရမယ်ဆိုပြီး သတ်မှတ်ထားတာ ရှိပါတယ်။ ခါးချဉ်ကျေးရွာဆိုရင် ဆန်အိတ် ၂၀ ကို အိမ်ခြေ ရှိသလောက် မျှခံကြရတယ်။ KIA ကတော့ အိမ်တစ်အိမ်ကို ဆန် ၁၆ ပြည် (၁ တင်း) ငွေ တစ်သောင်းကျပ်နဲ့ ဆား ၁ ပိဿာ ကောက်ခံနေပါတယ်” လို့ ပြောပါတယ်။

ဇန်နဝါရီလအတွင်း အပြီးပေးခိုင်းနေသလို မပေးနိုင်ကြောင်း ငြင်းဆိုတဲ့သူရှိရင် လာရောက် တိုင်ကြားဖို့ ကျေးရွာ‌တွေမှာရှိတဲ့ ရွာလူကြီးကို မှာကြားထားတယ်လို့လည်း ၎င်းက ဆက်ပြောပါတယ်။

နောက်ထပ် မြေပြင်အခြေအနေသိရှိသူ အမျိုးသားတစ်ဦးကလည်း “ကချင်ရွာဆိုပြီး ခွဲထားတာ မရှိပါဘူး။ ကချင်တွေကိုကျတော့ သီးသန့် ခေါ်တွေ့တာ ရှိတယ်။ အိမ်တိုင်း ပေးရမယ့်ပုံစံပါ။ နှစ်စဉ်ကြေးလို့ ပြောတယ်။ ခါတိုင်းနှစ်တွေလည်း ကောက်တယ်။ SSPP က သူတို့ရှမ်းပြည်ဆိုတဲ့ပုံစံနဲ့ အရင်နှစ်တွေဆို စစ်မှုထမ်းဖို့ လူပါ တောင်းတယ်။ KIA တပ်က ဒီနှစ်မှ စကောက်တာ အရင်ကတော့ ကောက်တာ မရှိပါဘူး” ဆိုပြီး ပြောပါတယ်။

ဆန်နဲ့ငွေ ကောက်ခံနေတဲ့ ရွာတွေမှာ ကချင်၊ ဗမာ၊ ဂေါ်ရခါး၊ ရှမ်း၊ တအာင်း၊ ကိုးကန့်နဲ့ ကရင်လူမျိုးတွေ ရောနှောနေထိုင်ကြတာဖြစ်ပြီး KIA ဟာ ကချင်လူမျိုးတွေကိုသာ ကောက်ခံတာဖြစ်ပြီး တခြားတိုင်းရင်းသားကိုတော့ ကောက်ခံတာ မရှိဘူးလို့ ၎င်းက ဆက်ပြောပါတယ်။

ကိုးကန့်တပ် ထိန်းချုပ်‌နယ်မြေမှာ ဘယ်အဖွဲ့အစည်းမှ ငွေနဲ့ စစ်မှုထမ်း ကောက်ခံတာကို လက်ခံမှာမဟုတ်ဘဲ ကောက်ခံတာရှိရင် တိုင်ကြားနိုင်ကြောင်း ကိုးကန့်တပ်‌က ပြောဆိုဖူးတယ်လို့ အထက်ပါ သတင်းအရင်းအမြစ်က ပြောပါတယ်။

“ဘယ်သူမှ မတိုင်ရဲကြပါဘူး။ ခြိမ်းခြောက်ထားတာ မရှိပေမဲ့ ကြောက်နေကြတာဘဲ။ အခု နေရတာလည်း မလုံခြုံဘူး။ သူခိုးဓားပြရန်ကတမျိုး စစ်ရေးကတစ်မျိုးလေ။ SSPP ကို ကြိုက်နှစ်သက်တဲ့သူတွေရှိသလို KIA တပ်ကို ထောက်ခံအားပေးတဲ့သူတွေလည်း ရှိတာပေါ့ဗျ”

၁၀၂၇ စစ်ဆင်ရေး ဒုတိယလှိုင်းအတွင်း လားရှိုးမြို့ကို သိမ်းပိုက်ပြီးနောက် KIA က ကချင်လူမျိုးတွေကို စစ်မှုထမ်းဖို့ ခေါ်တာကြောင့် ကိုးကန့်တပ်ဘက် တိုင်ကြားခဲ့တဲ့ ပန်ဝူးလျန်ရွာလူကြီးကို KIA က ဖမ်းဆီးသွားတဲ့ဖြစ်စဉ်လည်း ရှိခဲ့ကြောင်း ဒေသခံတွေရဲ့ ပြောပြချက်အရ သိရပါတယ်။

Shwe Phee Myay YouTube

Shwe Phee Myay Telegram

Leave a Reply

Your email address will not be published. Required fields are marked *

You May Also Like

မူဆယ်က ဖုန်းဆိုင်တစ်ဆိုင်မှာ ပြည်သူ့စစ်ဝတ်စုံနဲ့ ဓားပြ ဝင်တိုက်၊ ဓားပြတိုက်မှုဟာ မူဆယ်မှာ ဓလေ့တစ်ခုလိုဖြစ်ပြီး အထူးအဆန်း မဟုတ်တော့

စစ်ကောင်စီ ထိန်းချုပ်ထားတဲ့ ရှမ်းမြောက် တရုတ်-မြန်မာနယ်စပ်ဖြစ်တဲ့ မူဆယ်မြို့မှာ ပြည်သူ့စစ်ဝတ်စုံ ဝတ်ထားတဲ့ အမျိုးသား ၄ ဦးက ဖုန်းဆိုင်တစ်ဆိုင်မှာ ဓားပြတိုက်မှု ဖြစ်ပွားခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။

စစ်ကောင်စီတပ် မောင်းလာတဲ့ကားကို ပခုက္ကူ PDF ပူးပေါင်းတပ်ဖွဲ့က တိုက်ခိုက်ရာ ကားထဲ လိုက်ပါလာတဲ့ စစ်သား ၄ ဦး သေဆုံး

မကွေးတိုင်း ပခုက္ကူမြို့ စက်မှုဇုန် ၁ လမ်းမှာ စစ်ကောင်စီတပ် မောင်းနှင်လာတဲ့ ကားတစ်စီးကို ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့- Young Force UG က တိုက်ခိုက်ရာ ၄ ဦးစလုံး သေဆုံးခဲ့ကြောင်း Young Force UG ရဲ့ တာဝန်ရှိသူ ရဲ‌ဘော်တစ်ဦးက ရွှေဖီမြေကို ပြောပါတယ်။

စစ်ကောင်စီက မန္တလေးမြို့ပေါ် ဘောလုံးကွင်းနဲ့ စာသင်ကျောင်း ပတ်လည်မှာရှိတဲ့ နေအိမ်ဆိုင်ခန်းပေါင်း ၅၀၀ နီးပါးကို တစ်ပတ်အတွင်း ဖယ်ရှားခဲ့

စစ်ကောင်စီဟာ မန္တလေးမြို့ပေါ်က ဘောလုံးကွင်းနဲ့ စာသင်ကျောင်း ပတ်လည်မှာ ရှိနေတဲ့ နေအိမ်ဆိုင်ခန်းပေါင်း ၅၀၀ နီးပါးကို တစ်ပတ်အတွင်း ဖယ်ရှားရှင်းလင်းပစ်ခဲ့တယ်လို့ ဒေသခံတွေက ပြောပါတယ်။

ဒီးမော့ဆိုအနောက်ခြမ်းမှာ နှစ်သစ်ကူးကာလမှာတင် စစ်ကောင်စီတပ်က ၂ ရက်ဆက်တိုက် ဗုံးကြဲ၊ အရပ်သား ထိခိုက်မှုရှိ

ကရင်နီပြည် ဒီးမော့ဆိုအနောက်ခြမ်းရှိ စစ်ရှောင်တွေ နေထိုင်တဲ့နေရာမှာ စစ်ကောင်စီတပ်က နှစ်ရက်ဆက်တိုက် ဗုံးကြဲတိုက်ခိုက်ခဲ့ပါတယ်။