သုတ၊ မတ်လ ၂၉ ရက်
ရှမ်းမြောက် စက်သုံးဆီစျေးနှုန်းတွေ နေ့စဉ်လိုလို မြှင့်တက်နေပြီး မြို့နယ်အလိုက် တစ်လီတာကို ၁၂၀၀၀ ကျပ်ကနေ နှစ်သောင်းကျော်အထိ စျေးမြှင့်တက်လာတယ်လို့ ဒေသခံတွေက ရွှေဖီမြေကို ပြောပါတယ်။
ဒီနေ့ မတ်လ ၂၉ ရက်မှာ လားရှိုးက ပန့်ဆီဆိုင်မှာ ဆီတစ်လီတာကို ၁၂၅၀၀ ကျပ် ပေးရပြီး မြို့ပြင်နေရာတွေမှာတော့ တစ်လီတာကို တစ်သောင်းခွဲအထိ ပေးဝယ်နေရတယ်လို့ လားရှိုးမြို့ခံတစ်ဦးက ရွှေဖီမြေကို ပြောပါတယ်။
“ပန့်ဆီဆိုင်စျေးက (၁၂၅၀၀) ပေးရတယ်။ ဗူးနဲ့က တစ်လီတာကို တစ်သောင်းခွဲနဲ့ ရောင်းတယ်။ ဒီမှာက စျေးတအားတင်ရောင်းတယ်။ ဒီပုံစံနဲ့ဆို မလွယ်ဘူး” လို့ ဆိုပါတယ်။
တရုတ်-မြန်မာ နယ်စပ် နမ့်ခမ်းမြို့မှာတော့ ပန့်ဆီဆိုင်မှာ ဆီတစ်လီတာကို (၁၈၀၀၀) ကျပ် ပေးရပြီး၊ ကွတ်ခိုင်နဲ့ နမ္မတူမှာ တစ်လီတာကို တစ်သောင်းခွဲအထိ ပေးရတယ်လို့ မြို့ခံတွေဆီက သိရပါတယ်။
“တရုတ်ဘက်ကနေ ဆီတော့ ဝင်တယ်။ ဒါပေမယ့် စျေးတအားတက်တယ်။ တစ်ပေပါကို ၄၇ သိန်းလောက်ရှိတယ်” လို့ နမ့်ခမ်းမြို့ခံတစ်ဦးက ပြောပါတယ်။
မန်တုံမြို့မှာ ဒီနေ့ မတ်လ ၂၉ ရက်အထိ ဆီတစ်လီတာကို နှစ်သောင်းကျပ်အထိ စျေးရှိပြီး အကန့်အသတ်နဲ့သာ ရောင်းချပေးနေတယ်လို့ မန်တုံမြို့ခံတစ်ဦးက ပြောပါတယ်။
“တစ်လီတာကို နှစ်သောင်းပေးရတယ်။ ဒါတောင်မှ ဆီက မရှိဘူး”
အလားတူ ရှမ်းမြောက်ရှိ တခြားမြို့နယ်တွေမှာလည်း စက်သုံးဆီစျေးတွေ ဆက်တိုက် မြှင့်တက်နေတယ်လို့ သိရပါတယ်။
စက်သုံးဆီစျေး အခက်အခဲကြောင့် ရှမ်းမြောက်မှာ စားသောက်ကုန်စျေးတွေလည်း ဆက်တိုက် မြှင့်တက်နေပြီး ယာဉ်လိုင်းတချို့ ရပ်နားထားရတယ်လို့ ယာဉ်မောင်းတချို့က ပြောပါတယ်။
စစ်ကောင်စီတပ်ဘက်က စစ်သုံးဆီ အကြပ်အတည်းကို ဖြေရှင်းနိုင်ဖို့ အိမ်သုံးကားတွေကို စုံမခွဲဘဲ မောင်းနှင်ဖို့ အပါအဝင် ဝန်ထမ်းတွေအနေနဲ့ ဗုဒ္ဓဟူးနေ့တိုင်းမှာ နေအိမ်မှာပဲ ရုံးတက်ဖို့ အမိန့်ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
