မာည်းရူပ၊ ကျံရ်မာချှ် ဆငည်း 23၊ မိူင်မီတ်
ကဝ်အီဒဲႈဆဒါင် အ်ုန်အီဂေါည်ခေဲင်အရာပ်ကဲ က္လာင်းတဖုင်ဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ ဒေင်အ်ုန်အီတောပ်အရေး ကနာည်လံပ်ဆီုက် ဒေင်မိူင်မီတ် ကာည်း လှံင်သပိတ်ကျင်း ဒေင်ရဝ်တွင်းငယ်နီန် ကနာည်နံင်ဘယ်ကဲဒေထိင်ခြဲဟာဝ်း ကဲဂေါည်ပွံတ်ဒေဒါ ဆီုက်ငါးအာရ်ကဒါႇနီန် တီုက်ဟာဝ်းဖါ်ႈ ပ္လေါည်ကတီုက်ကပဴင်နီန်မာ် ပဲန်ကရဲင်ခည်းအောႏ။
ကဲဒါႈ တံပ်ကညာအာဏာဆီုက်ဇေဝ်ကဲ ဆီုက်ငါး အ်ုန်အီယိူဝ်ႇဒေဲႈကဒါႇရဝ်တွင်းငယ်နီန် အူကဒါႇ ကာည်း ဆီုက်ငါးအ်ုန်အီယိူဝ်ႇဒေဲႈကဒါႇ ကီုင်းမိူင်မီတ်နီန်အူကဒါႇ ဒါဖါ်ႈဆီုက်ငါးအာရ်ကဒါႇနီန် တီုက်ဟာဝ်းတံပ်လံပ်တီုက်ႎှီုန်းကဲ တောပ်ဒေင်မိူင်မီတ် – တွင်းငယ်နီန်အောႏ။
ကဝ်အီဒဲႈဆဒါင် အ်ုန်အီဂေါည်ခေဲင်အရာပ်ကဲအူအီး က္လာင်းတဖုင်ဆျှိုည်ဖီမျေဒါႈ “ ဆီုက်ငါးအ်ုန်အီယိူဝ်ႇဒေဲႈကဒါႇတွင်းငယ်နီန် ဟည်ရောတ်ပရဝ်သစ်ခွပင်နီန်။ ရဝ်သစ်ခွပင်နီန် အ်ုန်ဂေါည်ဒီစာပ် မိူင်မီတ် ကာည်းစ သပိတ်ကျင်းနီန်။ ဆီုက်ငါးအ်ုန်အီယိူဝ်ႇဒေဲႈကဒါႇမိူင်မီတ်နီန်မာ် ဟည်ရောတ်ပရဝ်ဘော်ဒေ။ ခနားဂါရ် ကဒိုင်းလိူည် 10 မဲင်ႏ”။
ဘိူန်းအယ်နံပ် ဆာ်အယ်တိူရ်ႈဘည်ခူရ်က္လာည်းအ်ုန် ကဒါႇဖုင်လံပ်တီုက်ႎှီုန်းကဲ ဆာ်ကတူႈဖါ်ႈဒေက္လိုတ်ႎီရ်ဒါႇဒေင် မိူင်မီတ် ကာည်း တွင်းငယ်နီန် တံပ်ကညာအာဏာဆီုက်ဇေဝ်ကဲ နံင်ရောတ်ပွံတ်ဒီဂေါည်ဂီုန်း ဖုင်လံပ်တီုက်ႎှီုန်းကဲ ပမိူင်မီတ် – ကီုင်းတကောင်းနီန်အောႏ။
ပမိူင်မီတ်နီန် ပ်ုန်ထိုးလီပ်တံပ်ကညာအာဏာဆီုက်ဇေဝ်ကဲ ဆဲႈဒါႇ ဖုင်အ်ုန်အီဂေါည်ခြူမ် NUG ကဲတီုက်ဟာဝ်းနီန် ဖုင် PLA ကာည်း ဖုင်ကောန်ကျောင် ABSDF ကဲမာ်တီုက်ဟာဝ်းအောႏ။
ကီုင်းတကောင်းအ်ုန်အီဂေါည်ခေဲင်လှံင်သပိတ်ကျင်းနီန် တံပ်ကပိုမ် ကာည်း NUG ကဲ ကတူႈဖါ်ႈက္လိုတ်ႎီရ်ဒါကီုင်းစီ ဒဲႈဟာဝ်းတတံပ်ကညာအာဏာဆီုက်ဇေဝ်ကဲအောႏ။
ဆဲႈဒီန် ဂေါႇဘည်ထိုးလီပ်ဒေဲႈကဲနီန် ခေဲင်ကပီုန်ဒါင်း မန်တလေး မတ္တရာ၊ စဉ့်ကူး ကာည်း ကီုင်းသပိတ်ကျင်းနီန် တံပ်လံပ်တီုက်ႎှီုန်းကဲ ကတူႈဒေက္လိုတ်ႎီရ် ခည်အာည်ႇဒိုႇဆန်ုန် 2025 ဒိူန်အောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
