ရွှေဖီမြေ၊ မတ်လ ၂၂ ရက်၊ ကွတ်ခိုင်
ကွတ်ခိုင်မြို့နယ် မုံးစီး၊ တက္ကနိုင်းနဲ့ တာမိုးညဲဒေသရှိ တအာင်းကျေးရွာတွေကို ကိုးကန့်တပ်- MNDAA က ယူနီဖောင်း ဝေပေးပြီး စစ်မှုထမ်းခိုင်းနေတယ်လို့ မုံးစီးဒေသခံ အမျိုးသားရဲ့ ပြောပြချက်အရ သိရပါတယ်။
ဒီနေ့ မတ်လ ၂၂ ရက် မနက်မှာ ကွတ်ခိုင်မြို့နယ် မုံးစီးဒေသရှိ ကောင်းနိမ်၊ ပြိန်းလုံ၊ မန်ဂျယ်၊ ကောင်းခမ်း၊ နမ့်မော၊ နမ့်ဆာ စတဲ့ရွာတွေမှာ တစ်ရွာကို ၂ ဦးနှုန်းနဲ့ MNDAA ယူနီဖောင်းပေးပြီး စစ်မှုထမ်းရမယ်လို့ ဆိုပါတယ်။
မုံးစီးဒေသခံ အမျိုးသားက “မသွားမနေရပုံစံလိုဘဲ။ သူတို့တပ်ထဲတော့ သွားစရာ မလိုသေးဘူး။ ဝတ်စုံဝတ်ပြီး ရွာထဲ နေရုံဘဲလို့တော့ ပြောထားတယ်” လို့ ပြောပါတယ်။
ဒါ့အပြင် တာမိုးညဲဒေသမှာလည်း စစ်မှုထမ်းဖို့ ပြောဆိုတာရှိကြောင်း တာမိုးညဲဒေသခံက ပြောဆိုပါတယ်။
”ဒီဒေသက ရွာကလူတွေ တော်တော်များများကို သူတို့အဖွဲထဲ အတင်းအဓမ္မ ဝင်ခိုင်းနေတယ်။ စစ်ယူနီဖောင်းတွေ လိုက်ပေးတယ်။ ရွာကလူတွေက မလွန်ဆန်ရဲကြဘူး။ ယူရတယ်”
ဒါ့အပြင် တက္ကနိုင်းဒေသက လူထုတွေကိုလည်း စစ်ယူနီဖောင်း ပေးပြီး ရွာစောင့်တပ်သားအဖြစ် နေထိုင်ကြဖို့ MNDAA က ပြောဆိုထားကြောင်း ဒေသခံတွေရဲ့ ပြောပြချက်အရ သိရပါတယ်။
အစည်းအဝေးခေါ်ပြီး စစ်ယူနီဖောင်း ဝေပေးချိန် မယူတဲ့ ရွာခံတွေကိုလည်း ဖမ်းဆီးထားတာရှိကြောင်း ဒေသခံတွေက ပြောပါတယ်။
အလားတူ ကွတ်ခိုင်မြို့နယ်ရှိ ကျေးရွာအုပ်စုတွေမှာလည်း MNDAA က ကျေးရွာအတွင်းနဲ့ စာသင်ကျောင်းမှာ တအာင်းအလံ ဖြုတ်ခိုင်းဖို့နဲ့ ကျေးရွာအဝင် ဆိုင်းဘုတ်တွေ ပြောင်းဖို့ အစည်းအဝေးခေါ်ပြီး ပြောဆိုခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
