ရွှေဖီမြေ၊ ဇန်နဝါရီ ၂၃ ရက်၊ ကျိုက်ဒုံ
ကရင်ပြည်နယ် ကျိုက်ဒုံမြို့ကို စစ်ကောင်စီတပ်က လေကြောင်းကနေ ဗုံးကြဲလို့ ဒေသခံ အမျိုးသမီးတစ်ဦး သေဆုံးပြီး နေအိမ်တချို့လည်း ထိမှန်ပျက်စီးခဲ့တယ်လို့ ကရင်အမျိုးသားအစည်းအရုံး- KNU က ဒီနေ့ ဇန်နဝါရီ ၂၃ ရက်မှာ ထုတ်ပြန်လာပါတယ်။
မနေ့ ဇန်နဝါရီ ၂၂ ရက် မနက် ၇ နာရီခွဲဝန်းကျင်မှာ Yak-130 Jet Fighter နဲ့ ကျိုက်ဒုံမြို့ မီးသတ်ရုံးအနီးက ရော်ဘာခြံမှာ ဗုံးလာကြဲတာကြောင့် ရော်ဘာခြစ်ပြီး ပြန်လာတဲ့ ကျိုက်ဒုံမြို့ အမှတ်(၃) ရပ်ကွက် ချောင်းဝပိုင်းမှာ နေထိုင်တဲ့ ဒေါ်ဒဝယ်မခေါ် ဒေါ်ညိုညိုဝင်းကို ထိမှန်သေဆုံးခဲ့ပြီး မီးသတ်ရုံးအနီးပတ်ဝန်းက နေအိမ်တချို့လည်း ထိမှန်ပျက်စီးခဲ့တယ်လို့ ဆိုပါတယ်။
အလားတူ ပြီးခဲ့တဲ့ ဇန်နဝါရီ ၁၁ ရက် မနက် ၂ နာရီခန့်မှာလည်း တိုက်ပွဲ ဖြစ်ပွားခြင်းမရှိဘဲ KNU ထိန်းချုပ်နယ်မြေ နို့တကောမြို့နယ် ယော့ကဒေါရွာကို ဗုံးကြဲခဲ့တာကြောင့် ယော့ကဒေါရွာက စာသင်ကျောင်း ၁ ကျောင်း ထိမှန်ပျက်စီးခဲ့တယ်လို့ ဖော်ပြထားပါတယ်။
ပြီးခဲ့တဲ့ ဇန်နဝါရီ ၂၁ ရက် နေ့လယ် ၃ နာရီမှာလည်း KNU ထိန်းချုပ်နယ်မြေဖြစ်တဲ့ ညောင်လေးပင်မြို့နယ်ကို စစ်တပ်က ဒရုန်းဗုံးကြဲလို့ ဦးဇင်းတစ်ပါး ပျံလွန်တော်မူပြီး ဦးဇင်းတစ်ပါးနဲ့ ဒေသခံ ၁ ဦး ဒဏ်ရာ ရခဲ့တယ်လို့ KNU ရဲ့ မနေ့ ဇန်နဝါရီ ၂၂ ရက် ထုတ်ပြန်ချက်အရ သိရပါတယ်။
လူထုတွေ နေထိုင်တဲ့ ကျေးရွာတွေကို စစ်တပ်က ရည်ရွယ်ချက်ရှိရှိ လေကြောင်းနဲ့ ဗုံးကြဲတာ၊ မြေပြင်ကနေ လက်နက်ကြီးနဲ့ ပစ်ခတ်တာတွေ လုပ်ပြီး လူ့အခွင့်အရေးနဲ့ စစ်ရာဇဝတ်မှုကို နေ့စဥ် ကျူးလွန်နေတယ်လို့လည်း ထုတ်ပြန်ချက်ထဲ ဖော်ပြထားပါတယ်။
