မိုင်းရူပ၊ မတ်လ ၁၇ ရက်၊ လောက်ကိုင်
ညီနောင်မဟာမိတ်တပ်တွေဖြစ်တဲ့ တအာင်းတပ်မတော်- PSLF/TNLA နဲ့ ကိုးကန့်တပ်မတော်- MNDAA အကြား ဖြစ်ပွားနေတဲ့ တိုက်ပွဲတွေရပ်ဖို့ နှစ်ဖက်ခေါင်းဆောင်တွေ လောက်ကိုင်မြို့မှာ တွေ့ဆုံနေတယ်လို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးက ရွှေဖီမြေကို ပြောပါတယ်။
မနေ့ မတ်လ ၁၆ ရက် ညနေ ၆ နာရီဝန်းကျင်ကစပြီး နှစ်ဖက်တပ် အပစ်ရပ်ထားပြီး ဒီနေ့ မတ်လ ၁၇ ရက်မှာ နှစ်ဖက်ခေါင်းဆောင်တွေ တွေ့ဆုံနေတယ်လို့ ဆိုပါတယ်။
“ဒီနေ့မနက်ပိုင်းမှာ ကျမတို့ ဗဟိုခေါင်းဆောင်တွေနဲ့ MNDAA ဘက်က ခေါင်းဆောင်တွေ တွေ့ဆုံဖို့ လောက်ကိုင်မှာ ရောက်နေကြတယ်။ လောလောဆယ် တိုက်ပွဲလည်း ငြိမ်သက်နေတယ်။ ဆွေးနွေးပွဲက အဆင်ပြေမယ်လို့ ကျမတို့ မျှော်လင့်တယ်” လို့ တအာင်းတပ်ရဲ့ ပြောရေးဆိုခွင့်ရှိသူ လွေးယေဦးက ရွှေဖီမြေကို ပြောပါတယ်။
MNDAA တပ်ရဲ့ အလစ်အငိုက် ဝင်ရောက်တိုက်ခိုက်မှုကြောင့် ကွတ်ခိုင်မြို့အပါအဝင် နမ့်ဖတ်ကာ၊ ၁၀၅ မိုင်နဲ့ နမ့်ခမ်း-နမ့်ဖတ်ကာကြားရှိ TNLA ရဲ့ တပ်စခန်းတွေ လက်လွှတ်ထားရပြီး တပ်ဖွဲ့ဝင် ၁၀၀ ကျော် ဖမ်းဆီးခံထားရတယ်လို့ လွေးယေဦးက ဆက်ပြောပါတယ်။
ဆွေးနွေးပွဲမှာ TNLA လက်လွှတ်ရတဲ့နေရာတွေ ပြန်ရဖို့ ဆွေးနွေးပွဲရလဒ်ပေါ် မူတည်ပြီး ပြောလို့ မရသေးကြောင်း လွေးယေဦးက ဆိုပါတယ်။
မတ်လ ၁၄ ရက် မနက်ပိုင်းကစပြီး ကွတ်ခိုင်မြို့အပါအဝင် မူဆယ် ၁၀၅ မိုင်၊ နမ့်ဖတ်ကာ၊ မုံးစီး စတဲ့နေရာ ၅ ခုထက်မနည်းက TNLA ရဲ့ တပ်စခန်းတွေကို ကိုးကန့်တပ်ဘက်က အင်အားထောင်ချီ အသုံးပြုပြီး ထိုးစစ်ဆင် တိုက်ခိုက်ခဲ့တာပဲ ဖြစ်ပါတယ်။
အချင်းချင်းကြား ဖြစ်ပွားနေတဲ့ တိုက်ပွဲတွေကို ချက်ချင်း ရပ်တန့်ပြီး နိုင်ငံရေးနည်းလမ်းနဲ့ တွေ့ဆုံဆွေးနွေး အဖြေရှာဖို့ MNDAA နဲ့ TNLA ကို အမျိုးသားညီညွတ်ရေး အတိုင်ပင်ခံကောင်စီ- NUCC အပါအဝင် တော်လှန်ရေးအင်အားစုတွေက တိုက်တွန်းထားကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
