အလင်း၊ မတ်လ ၉ ရက်၊ ဖလမ်း
ချင်းပြည်နယ် ဖလမ်းမြို့နယ်မှာ စစ်ကောင်စီရဲ့ ပစ်မှတ်ထား တိုက်ခိုက်မှုကြောင့် ၃ ရက်အတွင်း လူငယ်နဲ့ကျောင်းသူအပါအဝင် အရပ်သား ၃ ဦး သေဆုံးပြီး ဒဏ်ရာရသူ များခဲ့တယ်လို့ ဒေသခံတွေဆီက သိရပါတယ်။
မနေ့ မတ်လ ၈ ရက်က ဖလမ်းမြို့နယ် လုံဟော့ကျေးရွာ AG ဘုရားကျောင်းအနီးရှိ နေအိမ်တစ်လုံးကို စစ်တပ်က ဒရုန်းနဲ့ ဗုံးကြဲတိုက်ခိုက်ခဲ့ပါတယ်။
တိုက်ခိုက်မှုကြောင့် အသက် ၁၉ နှစ်အရွယ် ကျောင်းသူ Mai Ruth Van Lal Tha Nei Thiang သေဆုံးခဲ့ပြီး မိခင်ဖြစ်သူလည်း စိုးရိမ်ရတဲ့ဒဏ်ရာ ရရှိခဲ့ပါတယ်။
“ကျောင်းသူက အိမ်မှာ ထမင်းချက်နေတဲ့အချိန် ဒရုန်းဗုံးသီး ထိမှန်ပြီး နေရာလေးတင် ဆုံးသွားပါတယ်။ အမေဖြစ်သူလည်း ခြေ လက်တွေမှာ စိုးရိမ်ဒဏ်ရာ ရတယ်။ လောလောဆယ် ဆေးကုသမှု ခံယူနေပါတယ်” လို့ ဖလမ်းဒေသခံတစ်ဦးက ရွှေဖီမြေသို့ ပြောပါတယ်။
အလားတူ မတ်လ ၇ ရက်ကလည်း ဖလမ်းမြို့နယ် ဆိမ်ဇောလ်ရွာကို လက်နက်ကြီးနဲ့ ရမ်းသမ်းပစ်ခတ်မှုကြောင့် စစ်ဘေးရှောင်ရာကနေ ပစ္စည်းပြန်ယူတဲ့ အသက် ၁၄ နှစ်အရွယ် မောင်သီယန်နွန်ထန်း နေရာမှာတင် ပွဲချင်းပြီး သေဆုံးခဲ့ပါတယ်။
“လူငယ်တွေက စစ်ဘေးရှောင်ရာကနေ ရွာမှာ ပစ္စည်းသွားယူကြတာ။ အဲမှာ စစ်ကောင်စီ လက်နက်ကြီးကျည် ထိမှန်ပြီး သေဆုံးသွားတယ်။ တခြားလူငယ် ၂ ဦးလည်း ဒဏ်ရာ ရကြတယ်” လို့ ဖလမ်းဒေသခံတစ်ဦးက ရွှေဖီမြေသို့ ပြောပါတယ်။
ဆိမ်ဇောလ်ရွာမှာ ပြီးခဲ့တဲ့ မတ်လ ၆ ရက်ကလည်း လေကြောင်းကနေ ဗုံးကြဲတိုက်ခိုက်ခဲ့လို့ အသက် ၆၄ နှစ်အရွယ် ဒေါ်ကိမ်နွမ် သေဆုံးခဲ့ပြီး ၎င်းရဲ့သမီးဖြစ်သူက ခြေထောက်မှာ ပြင်းထန်ဒဏ်ရာ ရရှိခဲ့ပါတယ်။
စစ်တပ်ဟာ ဖလမ်းမြို့နယ်မှာ စစ်ရေးအရ အထိနာနေတာကြောင့် တိုက်ပွဲမရှိတဲ့ အရပ်သားနေထိုင်ရာ ကျေးရွာတွေကိုပါ ပစ်မှတ်ထားပြီး လက်နက်ကြီးနဲ့ဒရုန်း အသုံးပြုပြီး တိုက်ခိုက်နေတာပဲ ဖြစ်ပါတယ်။
လက်ရှိမှာ စစ်တပ်ရဲ့ တိုက်ခိုက်မှုကြောင့် ကျေးရွာပေါင်း ၁၃ ရွာခန့်မှ ဒေသခံ ၅ ထောင်ကျော်ဟာ တောတောင်အတွင်း ဘေးလွတ်ရာ တိမ်းရှောင်နေကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
