ဝတ်ရည်၊ မတ်လ ၇ ရက်၊ ဖားကန့်
တိုက်ပွဲ ဆက်လက် ပြင်းထန်နေတဲ့ ဖားကန့်မြို့နယ်မှာ စစ်ကောင်စီတပ်ရဲ့ လေကြောင်း တိုက်ခိုက်မှုကြောင့် မိခင်ဖြစ်သူ သေဆုံးခဲ့ပြီး အသက် ၃ နှစ်အရွယ် သားက ထိမှန်ဒဏ်ရာ ရရှိခဲ့တယ်လို့ ဖားကန့်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ မတ်လ ၇ ရက် နေ့လယ် ၁ နာရီဝန်းကျင်မှာ တိုက်ပွဲ ပြင်းထန်နေတဲ့ ဖားကန့်မြို့နယ် တာမခံကျေးရွာအုပ်စုထဲမှ ဒေသခံနေအိမ်ကို ဂျက်ဖိုက်တာနဲ့ လေကြောင်းကနေ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
ဖားကန့်မြို့ခံ အမျိုးသားတစ်ဦးက “သားအမိ ၂ ဦး ထိတာ။ အမေက အသက်ဆုံးရှုံးခဲ့ရပါတယ်။ သားဖြစ်သူကတော့ ဒဏ်ရာ ရတာပါ။ ဗုံးကြဲတဲ့နေရာက ကျောက်စိမ်းလုပ်ကွက်ထဲကို ကြဲတာ။ ပြီးရင် ဒေသခံတွေပဲ လေကြောင်းဒဏ်ကို ခံနေရတာလေ” လို့ ပြောပါတယ်။
ဗုံးကြဲတိုက်ခိုက်မှုကြောင့် သေဆုံးဒဏ်ရာ ရသူအပြင် နောက်ထပ် ဒေသခံ ၃ ဦးလည်း ထိမှန်ဒဏ်ရာ ရရှိခဲ့တယ်လို့ ဆိုပါတယ်။
စစ်ရေးသတင်းအရင်းအမြစ်တစ်ဦးက “မနေ့ကလည်း တိုက်ပွဲက တစ်နေကုန်ပဲ။ တစ်ညလုံးလည်း တိုက်ပွဲနဲ့ပဲ။ အခုလည်း လက်နက်ကြီးတွေနဲ့ ပစ်နေကြတာ။ တိုက်ပွဲ ပြင်းထန်တဲ့နေရာက မရှီကထောင်မှာပဲ” လို့ ပြောပါတယ်။
ပြီးခဲ့တဲ့ မတ်လ ၄ ရက် နေ့လယ် ၁ နာရီခွဲကျော်မှာလည်း ဖားကန့် ကလပ်ကုန်းလမ်းကြားမှာ လက်နက်ကြီး ကျရောက်ပေါက်ကွဲခဲ့တာကြောင့် ကလေး ၁ ဦးအပါအဝင် ၂ ဦး ဒဏ်ရာ ရရှိခဲ့ပါတယ်။
ဖားကန့်မြို့မှာ တိုက်ပွဲ လဝက်ကြာ ငြိမ်သက်ခဲ့ပြီး ပြီးခဲ့တဲ့ မတ်လ ၃ ရက်မှာ ပြန်လည် ဖြစ်ပွားနေတာပဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
