အိုက်ပွီး၊ ဇန်နဝါရီ ၂၂ ရက်၊ ခမ်းပတ်
စစ်ကိုင်းတိုင်း တမူးမြို့နယ် ခမ်းပတ်မြို့ကို စစ်ကောင်စီတပ်က သုံးရက်ဆက်တိုက် လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သားတွေဟာ ဘေးလွတ်ရာ ထွက်ပြေးတိမ်းရှောင်နေရတယ်လို့ ဒေသခံတွေဆီက သိရပါတယ်။
တိုက်ပွဲ ဖြစ်ပွားခြင်းမရှိဘဲ ဇန်နဝါရီ ၂၀ ရက်က ၁ ကြိမ်၊ ဇန်နဝါရီ ၂၁ ရက် ၁ ကြိမ်နဲ့ ဒီနေ့ ဇန်နဝါရီ ၂၂ ရက် မနက် ၁၀ နာရီမှာ ၁ ကြိမ် သုံးရက်ဆက်တိုက် လေကြောင်းကနေ ဗုံးကြဲတိုက်ခိုက်ခဲ့ပါတယ်။
“လေကြောင်းကနေ ဗုံးက နေ့တိုင်းလိုလို ကြဲပါတယ်။ အဲဒါကြောင့် လူတွေက မြို့ထဲမနေရဲတော့ဘူး။ အကုန်လုံး ထွက်ပြေးကုန်ကြပါပြီ။ မြို့ထဲမှာ ကျန်ရစ်တဲ့သူတွေလည်း ဗုံးကြဲခံရမှာကို ကြောက်လို့ ပုန်းခိုကျင်းထဲမှာပဲ ပုန်းနေရပါတယ်” လို့ ခမ်းပတ်မြို့ခံတစ်ဦးက ရွှေဖီမြေသို့ ပြောပါတယ်။
လေကြောင်း တိုက်ခိုက်မှုကြောင့် ခမ်းပတ်ဒေသခံတွေဟာ မြန်မာ-အိန္ဒိယနယ်စပ်နဲ့ အိန္ဒိယနိုင်ငံဘက် ထွက်ပြေးတိမ်းရှောင်နေကြရပြီး အမိုးအကာ၊ နေရာထိုင်ခင်း အကူအညီ လိုအပ်နေတယ်လို့ သိရပါတယ်။
ခမ်းပတ်မြို့ကို သုံးရက်ဆက်တိုက် လေကြောင်းကနေ ဗုံးကြဲတိုက်ခိုက်လို့ အရပ်သားနေအိမ်နဲ့ ဆိုင်ကယ် ထိခိုက်ပျက်စီးသွားတယ်လို့ သိရပါတယ်။
“ဇန်နဝါရီလ ၂၀ ရက်နေ့က နေအိမ် ၅ လုံး၊ ဆိုင်ကယ် ၃ စီး ပျက်စီးသွားတယ်။ ဒီနေ့လည်း ခမ်းပတ်မြို့ အမှတ်(၄) ရပ်ကွက်ဘက် ဗုံးသီး ငါးလုံး ကျတယ်။ ထိခိုက်မှုအခြေအနေက မကြည့်ရဲလို့ မသိရသေးဘူး။ ထိခိုက်မှုက ရှိနိုင်ပါတယ်” လို့ ခမ်းပတ်မြို့ခံတစ်ဦးက ရွှေဖီမြေသို့ ပြောပါတယ်။
ဇန်နဝါရီ ၁၆ ရက်ကလည်း ခမ်းပတ်မြို့ကို လေကြောင်းနဲ့ ဗုံးကြဲတိုက်ခိုက်လို့ ကလေးအပါအဝင် နှစ်ဦး သေဆုံးပြီး ဘုန်းကြီးကျောင်းအပါအဝင် လူနေအိမ် ၂၀ ထက်မနည်း ထိခိုက်ပျက်စီးသွားပါတယ်။
ခမ်းပတ်မြို့ကို ပြီးခဲ့တဲ့ ၂၀၂၃ ခုနှစ် နိုဝင်ဘာ ၇ ရက်မှာ ပြည်သူ့ကာကွယ်ရေးပူးပေါင်းတပ်က သိမ်းပိုက်ထိန်းချုပ်ထားပါတယ်။
