ရွှေဖီမြေ၊ ဇန်နဝါရီ ၂၂ ရက်၊ မူး
စစ်ကောင်စီတပ်က ဒရုန်းဗုံးကြဲတာနဲ့ လက်နက်ကြီး ပစ်ခတ်မှုကြောင့် ကရင်အမျိုးသားအစည်းအရုံး- KNU/KNLA ကော်သူးလေအုပ်ချုပ်နယ်မြေ ခလယ်လွီထူ (ညောင်လေးပင်ခရိုင်) ညောင်လေးပင်မြို့နယ်က ဦးဇင်းတစ်ပါး ပျံလွန်တော်မူပြီး ဦးဇင်းတစ်ပါးနဲ့ ဒေသခံတစ်ဦး ဒဏ်ရာ ရခဲ့တယ်လို့ KNU က ဒီနေ့ ဇန်နဝါရီ ၂၂ ရက်မှာ ထုတ်ပြန်လာပါတယ်။
မနေ့ ဇန်နဝါရီ ၂၁ ရက် နေ့လယ် ၃ နာရီက ညောင်လေးပင်မြို့နယ် ရေကြည်ချောင်းရွာအခြေစိုက် စစ်တပ်ရဲ့ ဒရုန်းနဲ့ ဗုံးကြဲတိုက်ခိုက်မှုကြောင့် ကွင်းဒလကြီးရွာ တောရကျောင်း၊ သစ်ကျောင်းပေါ် ကျရောက်ပေါက်ကွဲခဲ့ပြီး ဦးပဏ္ဏဝ (သက်တော် ၅၀ နှစ်)က ပျံလွန်တော်မူပြီး ဦးတေဇ (သက်တော် ၄၉ နှစ်)ကတော့ ဘယ်ဘက်ပေါင်နဲ့ မှော်ဖျားရွာမှ ၃၅ နှစ်အရွယ် ကိုမင်းထက်က လက်မောင်းတွေမှာ ကျည်စ ထိမှန်ဒဏ်ရာရခဲ့တယ်လို့ ဆိုပါတယ်။
အလားတူ အဲဒီနေ့မနက် ၁၀ နာရီမှာပဲ စစ်ကောင်စီရဲ့ ပိန်းဇလုပ် ၂၆၄ တပ်ကနေ လက်နက်ကြီး ပစ်ခတ်ခဲ့တာကြောင့် ပျဉ်ရေရွာအနောက်ဘက်ကမ်းရွာထဲ ကျရောက် ပေါက်ကွဲခဲ့ပြီး နေအိမ်တစ်လုံး ထိမှန်ပျက်စီးခဲ့တယ်လို့ ဖော်ပြထားပါတယ်။
ဒါ့အပြင် ပြီးခဲ့တဲ့ ဇန်နဝါရီ ၁၈ ရက် မနက် ၆ နာရီမှာလည်း မူးမြို့နယ် ခိုဖလလေးခို တပ်စခန်းက စစ်သားတွေဟာ တရေခိုရွာမှ ၂၅ နှစ်အရွယ် စောဟန်နေထူး၊ ၂၃ နှစ်အရွယ် စောဘုဘေ၊ ၁၈ နှစ်အရွယ် စောဒါးဒါးတို့ကို ဖမ်းဆီးသွားခဲ့ပြီး လက်ရှိအချိန်ထိ ပြန်မလွှတ်ပေးသေးဘူးလို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ ဇန်နဝါရီ ၁၇ ရက် ညနေ ၆ နာရီမှာလည်း လယ်ဒိုမြို့နယ် ကွမ်းချောင်းဝကနေ စစ်တပ်က ပစ်ခတ်တဲ့ ၁၂၀ မမ လက်နက်ကြီးတစ်လုံးဟာ တောကြောင်ပေါက်ရွာအနီး ကျရောက် ပေါက်ကွဲခဲ့တယ်လို့ ဆိုပါတယ်။
