ရွှေဖီမြေ၊ ဖေဖော်ဝါရီ ၂၈ ရက်
တအာင်းတပ်- PSLF/TNLA က တရုတ်ပြည်မှာ စစ်ကောင်စီနဲ့ သွားရောက်ကာ တွေ့ဆုံဆွေးနွေးခဲ့တယ်ဆိုတဲ့ BBC ရဲ့ သတင်းဖော်ပြချက်ဟာ မှန်ကန်မှု မရှိကြောင်း တအာင်းတပ်ရဲ့ အထွေထွေအတွင်းရေးမှူး ဗိုလ်ချုပ် တားဘုန်းကျော်က သူ့ရဲ့ Facebook လူမှုကွန်ရက်မှာ ရေးသားလာပါတယ်။
အဲဒီသတင်းကို BBC က ဒီနေ့ ဖေဖော်ဝါရီ ၂၈ ရက် နေ့လယ်ပိုင်းမှာ ဖော်ပြထားတာဖြစ်ပြီး သတင်းဖော်ပြချက်ထဲ စစ်တပ်က PSLF/TNLA ထိန်းချုပ်ထားတဲ့ မြို့တွေကို ပြန်လည် တောင်းယူပြီး တအာင်းတပ်ဖက်က သဘောမတူတာကြောင့် ဆွေးနွေးပွဲ မအောင်မြင်ခဲ့ဘူးလို့ ဆိုပါတယ်။
ဗိုလ်ချုပ် တားဘုန်းကျော်က “မိမိတို့ရဲ့ ခေါင်းဆောင်ကိုယ်စားလှယ်တွေ ဖေဖော်ဝါရီလ ၂၀ ရက်ကနေ ၂၇ ရက် ကာလအတွင်း တရုတ်နိုင်ငံ ကူမင်းမြို့ ဘယ်ခရီးစဉ်မှ မရှိပါ။ သတင်းရေးကြသူများက ရေးချင်သလို ရေးနေကြခြင်းသာ” လို့ BBC ရဲ့ သတင်းဖော်ပြချက်ကို မျှဝေပြီး ဖော်ပြခဲ့ပါတယ်။
PSLF/TNLA က စစ်ကောင်စီထံ နောင်ချို၊ ကျောက်မဲ၊ သီပေါမြို့ကို လက်လွှတ်ဆုံးရှုံးခဲ့ရပြီး တရုတ်ကြားဝင်စေ့စပ်ပေးမှုနဲ့ မိုးကုတ်နဲ့မိုးမိတ်မြို့ကို စစ်ကောင်စီထံ ပြန်လည် လွှဲအပ်ခဲ့ကာ လက်ရှိမှာ နမ့်ခမ်း၊ ကွတ်ခိုင်၊ နမ္မတူ၊ မန်တုံ၊ နမ့်ဆန်၊ မိုင်းငေါ့နဲ့ မိုင်းလုံမြို့ကို ထိန်းချုပ်ထားတာပဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
