ယာရူစိင်း၊ ဇန်နဝါရီ ၂၂ ရက်၊ ကျိုင်းတုံ
ရှမ်းအရှေ့ ကျိုင်းတုံမြို့မှာ မီးလောင်မှု ဖြစ်ပွားရာကနေ အိမ်ရှင်အမျိုးသားတစ်ဦး သေဆုံးသွားတယ်လို့ သိရပါတယ်။
မနေ့ ဇန်နဝါရီ ၂၁ ရက် မနက်အစောပိုင်းမှာ ဖြစ်ပွားခဲ့တာဖြစ်ပြီး မီးလောင်မှုကြောင့် ကျိုင်းတုံမြို့ အမှတ်(၅)ရပ်ကွက် နောင်ခေ့ရွာမှာ နေထိုင်တဲ့ အိမ်ရှင်ဖြစ်သူ ဦးအောင်နိုင် သေဆုံးခဲ့တာပဲ ဖြစ်ပါတယ်။
ဖြစ်စဉ်သိရှိသူ အမျိုးသားတစ်ဦးက “မီးလောင်လို့ အိမ်တစ်ခုလုံး ပြာကျသွားခဲ့ရပါတယ်။ သူလည်း မီးလောင်တာ မတွေ့တာလား မဟုတ်ရင် အိပ်ပျော်တာလားတော့ မသိဘူး။ ဘာကြောင့် မီးလောင်မှု ဖြစ်သွားလဲတော့ သေချာမသိရပါဘူး။ သတင်းတွေ အမျိုးမျိုးထွက်တာဘဲ လျှပ်စစ်မီး ဝါယာကြိုး ရှော့လ်ဖြစ်တာ ပိုများမယ်လို့ ကျနော်ထင်တယ်” လို့ ပြောပါတယ်။
မီးဟာ အချိန်ကြာမြင့်စွာ လောင်ကျွမ်းတာကြောင့် ကျိုင်းတုံခရိုင်နဲ့ မြို့နယ်မီးသတ်စခန်းမှ ယာဉ် ၁ စီးအပါအဝင် မီးငြိမ်းသတ်ယာဉ် ၄ စီး၊ ရေသယ်ယာဉ် ၁ စီးနဲ့ ငြှိမ်းသတ်ခဲ့ရာ မနက် ၄ နာရီကျော်ဝန်းကျင်မှ မီးငြှိမ်းသွားကြောင်း တာချီလိတ် သတင်းအေဂျင်စီမှာ ရေးသားထားပါတယ်။
သေဆုံးသူရဲ့ အလောင်းကို တိုင်းနေ နာရေးကူညီမှုအသင်းက သွားရောက် သယ်ဆောင်ပြီး ဆေးရုံရှိ ရင်ခွဲရုံသို့ ပို့ဆောင်ပေးထားတယ်လို့ ဆိုပါတယ်။
