ပျားကြီး၊ ဇန်နဝါရီ ၂၂ ရက်၊ ပုသိမ်
ဧရာဝတီတိုင်း ပုသိမ်မြို့နယ် ရွှေသောင်ယံမြို့အနီးက တိုက်ပွဲကြောင့် သောင်းနဲ့ချီတဲ့ ဒေသခံတွေဟာ ဘေးလွတ်ရာ ထွက်ပြေးတိမ်းရှောင်နေရတယ်လို့ ဒေသခံတွေက ပြောပါတယ်။
ဇန်နဝါရီ ၉ ရက်ကတည်းက စတင်ခဲ့တဲ့ အာရက္ခတပ်တော်- AA နဲ့ စစ်ကောင်စီတပ်အကြား ရွှေသောင်ယံမြို့အနီးက တိုက်ပွဲကြောင့် ရွှေသောင်ယံ၊ ငွေသောင်ယံ၊ ချောင်းသာ စတဲ့ပင်လယ်ကမ်းခြေမြို့က ဒေသခံတွေဟာ နေ့စဥ်နဲ့အမျှ ထွက်ပြေးတိမ်းရှောင်နေရတာ ဖြစ်ပါတယ်။
“အခုက မြို့တွေတိုင်းမှာ လူက အနည်းစုပဲ ကျန်တော့မယ်။ ငွေကြေး တတ်နိုင်တဲ့သူတွေကတော့ အကုန်ထွက်သွားကြပြီ။ ချောင်းသာဖက်က လူတွေပါ ထွက်ကုန်ကြပြီ။ အဲဒီမှာလည်း ၃ ပုံ ၁ ပုံလောက်ပဲ ကျန်တော့တယ်” လို့ ရွှေသောင်ယံမြို့ခံတစ်ဦးက ပြောပါတယ်။
မကျီးဇင်ရဲကင်းစခန်း တိုက်ခိုက်သိမ်းပိုက်မှုနဲ့ စတင်ခဲ့တဲ့ ဧရာဝတီတိုင်းအတွင်းက အာရက္ခတပ်တော်နဲ့ စစ်တပ်ကြားက တိုက်ပွဲဟာ နေ့စဥ်နီးပါး ရှိနေတာကြောင့် ဒေသခံတွေဟာ သာပေါင်း၊ ပုသိမ်နဲ့ ရန်ကုန်မြို့ဖက် ထွက်ပြေးတိမ်းရှောင်နေရတာ ဖြစ်ပါတယ်။
စစ်ကောင်စီရဲ့ အနောက်တောင် တိုင်းစစ်ဌာနချုပ် အခြေစိုက်တဲ့ ပုသိမ်မြို့နဲ့ မိုင် ၃၀ ဝန်းကျင်အထိ ရောက်ရှိလာတဲ့ စစ်ပွဲကြောင့် ထွက်ပြေးနေရတဲ့ ဒေသခံ စစ်ဘေးရှောင်ရဲ့ မော်တော်ယာဥ်တန်းဟာ ချောင်းသာ-ပုသိမ်နဲ့ ပုသိမ်-ရန်ကုန် ကားလမ်းပေါ်မှာ ယာဥ်ကြော ပိတ်ဆို့မှု ဖြစ်တဲ့အထိ ရှိနေတာကို တွေ့ရပါတယ်။
