ရဲမာန်၊ ဖေဖော်ဝါရီ ၂၄ ရက်၊ မြင်းမှု
စစ်ကိုင်းတိုင်း မြင်းမှုမြို့နယ် ရွှေကျောင်းကန်ရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့လို့ အသက် ၂ နှစ်အရွယ် ကလေး ၁ ဦးအပါအဝင် ၉ ဦးသေဆုံးခဲ့တယ်လို့ မြင်းမူမြို့နယ် မီးဘေးလုံခြုံရေး တာ၀န်ခံက ရွှေဖီမြေကို ပြောပြပါတယ်။
မနေ့ ဖေဖော်ဝါရီ ၂၃ ရက် ည ၇ နာရီဝန်းကျင်မှာ မုံရွာအနောက်မြောက်တိုင်းစစ်ဌာနချုပ်(နမခ)တက် ပါရာမော်တာ ၂ စီးနဲ့ ဗုံး ၃ လုံး လာရောက်ကြဲချတိုက်ခိုက်ခဲ့တာဖြစ်တယ်လို့ ၎င်းက ပြောပါတယ်။
“ကျေးရွာအ၀င်လမ်းက Starlink ဆိုင်နှင့် ဆီကြိတ်စက်ရှိတဲ့ နေရာတွေကို ကြဲသွားတာပါ။ သေဆုံးသူတွေက Starlink Wifi အသုံးပြုနေတဲ့ အရပ်သားနဲ့ ကျေးရွာ ဆီကြိတ်စက်က လုပ်ငန်းလုပ်နေသူတွေပါ။ ကလေးနှစ်ဦးထဲက ၁ ဦးက (၂)နှစ်လို့ သိရှိထားရပါတယ်”
အဆိုပါဗုံးကြဲတိုက်ခိုက်မှုမှာ ကလေး ၂ ဦး၊ အမျိုးသား ၄ ဦးနဲ့ အမျိုးသမီး ၃ ဦးတို့ သေဆုံးခဲ့ရတဲ့အပြင် နွား ၂ ကောင်လည်း သေဆုံးခဲ့ရတယ်လို့ သိရပါတယ်။
“စစ်ရေး၊ နိုင်ငံရေး နှစ်ဖက်လုံးရှုံးနေပြီဖြစ်တဲ့ စစ်ကောင်စီတပ်က ပြည်သူတွေအပေါ် လေကြောင်းနဲ့ ခြိမ်းခြောက်မှုပြုလုပ်နေတယ်လို့ မြင်မိပါတယ်။ ပြည်သူတွေအနေနဲ့ လည်း လေကြောင်းအသိ လေကြောင်းသတိရှိဖို့ စကားပါးလိုက်ချင်တယ်” လို့ အထက်ပါအမျိုးသားက ဆက်ပြောပါတယ်။
အလားတူ မနေ့ ဖေဖော်ဝါရီ ၂၃ ရက် ည ၁၀ နာရီဝန်းကျင်မှာ စစ်ကောင်စီတပ်က မန္တလေးတိုင်း ငါးဇွန်မြို့နယ် တလင်းကုန်းကျေးရွာကို ဂျိုင်ရိုကော်ပါတာနဲ့ ဗုံးကြဲတိုက်ခိုက်ခဲ့လို့ ၈ နှစ်အရွယ်ကလေး ၁ ဦးအပါအဝင် အရပ်သား ၃ ဦးသေဆုံးခဲ့ရတယ်လို့ Monywa Revolution -MR က ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
