ပျားကြီး၊ ဇန်နဝါရီ ၂၂ ရက်၊ ဆိပ်ဖြူ
မကွေးတိုင်း ဆိပ်ဖြူမြို့နယ် ကပစ ၂၂ တပ်မှ စစ်ကောင်စီတပ်ဖွဲ့ဝင်ဟာ အနီးအနားက ကျေးရွာငယ်ကို မီးရှို့ဖျက်ဆီးမှု ထပ်မံ လုပ်ဆောင်နေတယ်လို့ ဒေသခံတွေက ပြောပါတယ်။
ဒီနေ့မနက် ၉ နာရီဝန်းကျင်က စစ်ကောင်စီရဲ့ စစ်လက်နက်ပစ္စည်း ထုတ်လုပ်ရေးစက်ရုံ (ကပစ ၂၂)အနီးဝန်းကျင်က ဖက္ကနား၊ သစ္စည်း စတဲ့ရွာငယ်တွေကို မီးရှို့ဖျက်ဆီးနေတာ ဖြစ်ပါတယ်။
“ဒုတိယအကြိမ် ရှို့တာပေါ့။ အခုအကုန် ကုန်သွားပြီ။ ရွာကလူတွေနဲ့ တွေ့ချင်တယ်ဆိုပြီး ပြောနေတာ။ ဒါပေမဲ့ ကြောက်တယ်လေ။ ဘယ်သူမှ သွားမတွေ့ရဲဘူး။ အကုန်ပုန်းနေကြရတာ” လို့ ဒေသခံတစ်ဦးက ပြောပါတယ်။
အိမ်ခြေ ၅၀ နီးပါးပဲရှိတဲ့ ဖက္ကနားရွာကို ပြီးခဲ့တဲ့ ဒီဇင်ဘာ လကုန်ပိုင်းကလည်း စစ်ကောင်စီက နယ်မြေရှင်းလင်းရေး ပြုလုပ်ပြီး အိမ်ပေါင်း ၃၇ လုံးကို မီးရှို့ဖျက်ဆီးရာ လက်ရှိမှာတော့ ကျန်နေသေးတဲ့ အိမ်တွေကို ဆက်လက် မီးရှို့ဖျက်ဆီးတာ ဖြစ်ပါတယ်။
စစ်ကောင်စီအတွက် အကြီးစား စစ်လက်နက်ပစ္စည်း ထုတ်လုပ်ပေးနေတဲ့ ကပစ ၂၁ နဲ့ ၂၂ တပ်ဟာ ပြီးခဲ့တဲ့ အပတ်က ဒေသခံပြည်သူ့ကာကွယ်ရေးတပ်ရဲ့ တိုက်ခိုက်မှုကို ခံခဲ့ရတာကြောင့် အခုလို အနီးအနားက ကျေးရွာတွေကို နယ်မြေရှင်းလင်းရေး လုပ်ဆောင်နေတာ ဖြစ်တယ်လို့ ဒေသခံ ပြည်သူ့ကာကွယ်ရေး တပ်ဖွဲ့ဝင်တစ်ဦးက ပြောဆိုပါတယ်။
ပြီးခဲ့တဲ့ ဇန်နဝါရီ ၁၈ ရက်က ဒေသခံ ပြည်သူ့ကာကွယ်ရေး ပူးပေါင်းအဖွဲ့တွေဟာ ကပစ ၂၁ ကို ရှော့တိုက်ဒုံးနဲ့ ပစ်ခတ်တိုက်ခိုက်ခဲ့ရာ စစ်အရာရှိ ၂ ဦးအပါအဝင် ၉ ဦး သေဆုံးခဲ့ပြီး တစ်ချိန်တည်းမှာ ဖြစ်ပွားခဲ့တဲ့ ကပစ ၂၂ က စစ်ကောင်စီတပ်ဖွဲ့ဝင် ၁၁ ဦး ပါဝင်တဲ့ စစ်ကြောင်းကို ပစ်ခတ်တိုက်ခိုက်မှု ပြုလုပ်ခဲ့ချိန်မှာလည်း ၈ ဦး သေဆုံးပြီး ၁ ဦး ခြေထောက်ပြတ်ဒဏ်ရာ ရရှိခဲ့တယ်လို့ သိရပါတယ်။
