လွေးဇွန်မိုး၊ ဖေဖော်ဝါရီ ၁၉ ရက်၊ ခင်ဦး
စစ်ကိုင်းတိုင်း ခင်ဦးမြို့နယ် ညောင်ပင်ကြီးစုရွာကို စစ်ကောင်စီတပ်က လေကြောင်းနဲ့ ပေါင် ၂၅၀ ဗုံးကြဲချတိုက်ခိုက်လို့ ဒေသခံ အမျိုးသား ၂ ဦးနဲ့ အမျိုးသမီးတစ်ဦး သေဆုံးခဲ့ပြီး ၈ ဦးဒဏ်ရာရခဲ့တယ်လို့ ဒေသခံ အမျိုးသမီးတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၁၇ ရက် ည ၁၀ နာရီဝန်းကျင်မှာ တံတားဦးလေတပ်ကနေ တက်လာတဲ့ ဂျက်ဖိုက်တာတစ်စီးဟာ ညောင်ပင်ကြီးစုရွာက စစ်ရှောင်တွေ နေထိုင်တဲ့ စာသင်ကျောင်းကို ဗုံးကြဲတိုက်ခိုက်ခဲ့တာဖြစ်တယ်လို့ အထက်ပါ အမျိုးသမီးက ပြောပါတယ်။
“တစ်ယာက်က ခရီးသွားဧည့်သည်လို့ပြောတယ်။ ဒီနေ့ ပြန်မဲ့ဟာကို မနေ့က တစ်ညအိပ်လိုက်လို့။ ရွှေဘိုကနေ ခရီးသွားဧည့်သည်တဲ့။ အဲဒီသေဆုံးသွားတဲ့ သူတစ်ယောက်ကတော့”
အဲဒီဗုံးကြဲမှုကြောင့် ကိုကျော်မြင့်၊ ကိုစိုးတင့် နဲ့ ဒေါ်ရွှေကြိုင် တို့ ၃ ဦး သေဆုံးခဲ့ပြီး မအုံမာ၊ ကိုဝင်းအောင်၊ ဒေါ်သောင်းဌေး၊ ကိုကိုမောင်၊ ဇင်မျိုးသူ၊ အောင်ဇင်လင်း၊ ဒေါ်ခင်တင့်နဲ့ ဒေါ်တုတ် ဆိုသူတို့ ဒဏ်ရာရခဲ့တယ်လို့ ဆိုပါတယ်။
အလားတူ ပြီးခဲ့တဲ့ ဇန်နဝါရီ ၅ ရက် ည ၈ နာရီမှာလည်း ခင်ဦးမြို့နယ် ကုန်းကြီးကျေးရွာ၊ စာသင်ကျောင်းကို စစ်ကောင်စီတပ်က တိုက်လေယာဉ်တစ်စီးနဲ့ ဗုံးကြဲတိုက်ခိုက်ခဲ့လို့ စစ်ရှောင် ၃ ဦးသေဆုံးပြီး ၁၀ ဦးဝန်းကျင်ဒဏ်ရာရခဲ့တယ်လို့ ခင်ဦးမြို့နယ် ပြည်သူ့အုပ်ချုပ်ရေးအဖွဲ့ (ပအဖ) က ထုတ်ပြန်ထားပါတယ်။
ဒါ့အပြင် ပြီးခဲ့တဲ့ ဒီဇင်ဘာ ၂၇ ရက်မှာလည်း ခင်ဦးမြို့နယ် အရှေ့ခြမ်း မြေနီလျှိုရွာက ခရီးသွားကားတွေ ခေတ္တရပ်နားတဲ့ မြေနီလျှိုလမ်းဆုံကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၉ ဦးထက်မနည်း သေဆုံးပြီး ၁၀ ဦးကျော် ဒဏ်ရာရခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
