လွေးလာဝ်ဇာရ်၊ ဖေဖော်ဝါရီ ၁၇ ရက်၊ ဖားကန့်
ကချင်ပြည်နယ် ဖားကန့်မြို့နယ် လုံးခင်းကျေးရွာအုပ်စု ကဋေမှော်မှာ မြေစာပုံပြိုကျမှုကြောင့် ထိခိုက်ဒဏ်ရာရသူတွေရှိပေမယ့် ပျောက်ဆုံးသေဆုံးမှု မတွေ့ရဘူးလို့ ဖားကန့် ပရဟိတအဖွဲ့ဝင်တွေထံက သိရပါတယ်။
မနေ့ ဖေဖော်ဝါရီ ၁၆ ရက် ည ၉ နာရီခွဲဝန်းကျင်မှာ လုံးခင်းအုပ်စုထဲက အဲဗားကုမ္ပဏီရဲ့လုပ်ကွက်တစ်ခုမှာ မြေစာပုံပြိုကျမှု ဖြစ်ပွားခဲ့ပြီး ထိခိုက်ဒဏ်ရာရသူတွေရဲ့ အရေအတွက်ကိုတော့ လက်ရှိအချိန်အထိ မသိရဘူးလို့ ဆိုပါတယ်။
ဖားကန့်က ပရဟိတအဖွဲ့ဝင်တစ်ဦးက “ဒဏ်ရာရတဲ့သူတွေကတော့ ရှိတယ်။ သူ့ဟာသူ ရေကူးပြီးမှ လွတ်မြောက်တာ။ သူ့ဟာသူဆေးခန်းသွားပြကြတာဆိုတော့ အရေအတွက်တော့ မပြောပြနိုင်ဘူးဖြစ်နေတယ်။ သေဆုံးသူစားရင်းမရှိဘူးဆိုတာလည်း ဥပမာ မိသားစုဝင်တွေပါသွားလို့ သူငယ်ချင်းနှစ်ယောက်ထဲက တစ်ယောက်ပျောက်သွားလို့ အဲလို အကူအညီလာတောင်းတာလည်း မရှိတော့ သေဆုံး ပျောက်ဆုံးသူ မရှိဘူးလို့ ပြောလို့ရတယ်” လို့ ပြောပါတယ်။
လက်ရှိမှာ အဲဗားကုမ္ပဏီဘက်ကလည်း လုပ်ငန်းပုံမှန်အတိုင်း ဆက်လက် လည်ပတ်နေဆဲဖြစ်တယ်လို့ ဆိုပါတယ်။
ဖားကန့်မြို့နယ်ရှိ ကျောက်လုပ်ကွက်တွေမှာ အခုလို မြေစာပုံပြိုကျပိမိပြီး လူထိခိုက်သေဆုံးတာတွေ မကြာခဏ ဖြစ်ပွားနေတယ်လို့ ဒေသခံတွေက ပြောပါတယ်။
ပြီးခဲ့တဲ့ ၂၀၂၅ ခုနှစ် ဒီဇင်ဘာ ၁၀ ရက်မှာလည်း လုံခင်းကျေးရွာအုပ်စု မှော်စီစာကျေးရွာရှိ စိန်စိန်ကုမ္ပဏီရဲ့ လုပ်ကွက်ဟောင်းအတွင်းမှာ မြေစာပုံ ပြိုကျခဲ့တာကြောင့် အမျိုးသား ၂ ဦး သေဆုံးသွားခဲ့တာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
