ဝတ်မှုံ၊ ဖေဖော်ဝါရီ ၁၄ ရက်၊ တောင်ကြီး
စစ်ကောင်စီတပ် ထိန်းချုပ်ထားတဲ့ ရှမ်းတောင် တောင်ကြီးမြို့နယ် အေးသာယာမြို့မှာ ကားအရောင်းအဝယ်လုပ်တဲ့ ညီအစ်ကို ၂ ဦးကို ကားဝယ်သူက ဓားနဲ့ထိုးသွားလို့ ညီလေးဖြစ်သူသေဆုံးပြီး အစ်ကိုဖြစ်သူက ဒဏ်ရာရခဲ့တယ်လို့ ရွှေဖီမြေက စုံစမ်းသိရပါတယ်။
ဒီနေ့ ဖေဖော်ဝါရီ ၁၄ ရက် မနက် ၉ နာရီဝန်းကျင်မှာ ကားဝယ်သူက ငွေချေမယ်ဆိုပြီး ကားရောင်းသူ ညီအစ်ကို ၂ ယောက်ကို အေးသာယာမြို့ကနေ ဟဲဟိုးမြို့ကို ခေါ်သွားပြီး လမ်းတစ်ဝက်မှာတင် ဓားနဲ့ထိုးသွားခဲ့တာဖြစ်တယ်လို့ ဖြစ်စဥ်သိရှိသူ ဒေသခံတစ်ဦးက ပြောပါတယ်။
“အေးသာယာမှာ ကားကြည့်ပြီးတော့ မနက်အစော ကားကြည့်ပြီးတော့ ကားကြိုက်တယ်။ ငွေချေမယ်ဆိုပြီးတော့ ဟဲဟိုးကို သွားတာ။ အဲမှာ လမ်းမှာထိုးခံရတာပါ”
အဆိုပါ ညီအစ်ကို ၂ ယောက်ဟာ အေးသာယာမှာ နေထိုင်သူဖြစ်ပြီး ဓားထိုးမှုကြောင့် ညီလေးဖြစ်သူ သေဆုံးသွားပြီး အစ်ကိုဖြစ်သူ ဒဏ်ရာရခဲ့တယ်လို့ ဆိုပါတယ်။
လက်ရှိမှာတော့ ဓားနဲ့ထိုးခဲ့တဲ့ တရားခံ အမျိုးသားကိုတော့ ရဲတပ်ဖွဲ့တွေက ဖမ်းမိထားတယ်လို့ ဆိုပါတယ်။
အလားတူ ရှမ်းမြောက် လားရှိုးမြို့မှာလည်းအောက်တိုဘာ ၁၈ ရက် ညနေ ၅ နာရီဝန်းကျင်မှာ ရပ်ကွက် (၁၀) ရှိ တိုင်းလမ်းခွဲမှာ အမျိုးသားတစ်ဦးနဲ့ အမျိုးသမီးတစ်ဦးက ကားဝယ်မယ်လို့ ဆိုကာကားကိုအစမ်းမောင်းကြည့်မယ်ဆိုပြီး ကားခိုးယူထွက်ပြေးသွားခဲ့တယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
