ရွှေဖီမြေ၊ ဖေဖော်ဝါရီ ၁၃ ရက်
တအာင်းတပ်မတော် – PSLF/TNLA ထိန်းချုပ်ထားတဲ့ ဒေသမှာ ၎င်းတို့ တပ်သားတွေအပါအဝင် တခြားသော လက်နက်ကိုင်တပ်သားတွေက ပြည်သူလူထုအပေါ် လူ့အခွင့်အရေးချိုးဖောက်ပြီး ရိုက်နှပ်နှိပ်စက်တာတွေရှိရင် ပြည်သူ့ဆက်ဆံရေးစင်တာ – PRC ကို တိုက်ရိုက်တိုင်ကြားနိုင်တယ်လို့ သိရပါတယ်။
PRC ဟာ ပြည်သူလူထုနဲ့ PSLF/TNLA ရဲ့ ဗဟိုအထွေထွေအုပ်ချုပ်ရေးဦးစီးဌာနနဲ့ တိုက်ရိုက်ချိတ်ဆက်ပေးတဲ့ စင်တာတစ်ခုဖြစ်ပြီး တအာင်းဒေသအတွင်းရှိ မိဘပြည်သူတွေ အားလုံးရဲ့ အခြေခံ အခွင့်အရေးကို ကာကွယ်နိုင်ဖို့နဲ့ လူ့အခွင့်အရေးချိုးဖောက်မှုတွေကို မှတ်တမ်းတင်ဖို့ ရည်ရွယ်ပြီး ဖွဲ့စည်းခဲ့တယ်လို့ ဆိုပါတယ်။
PRC ရဲ့ အဓိက လုပ်ငန်းစဉ်တွေထဲမှာ လူ့အခွင့်အရေးချိုးဖောက်ခံရတဲ့ ဒေသခံတွေရဲ့ အချက်အလက်၊ ကျူးလွန်တဲ့ လက်နက်ကိုင် အဖွဲ့အစည်းတွေရဲ့ အချက်အလက်တွေကို ကောက်ယူစုဆောင်းခြင်းနဲ့ ဖြေရှင်းခြင်းတို့ ပါဝင်ပါတယ်။
ဒါ့အပြင် စစ်ဘေးသင့်တဲ့ ပြည်သူတွေရဲ့ စာရင်းတွေကို ကောက်ယူခြင်းနဲ့ ကူညီဆောင်ရွက်ခြင်း၊ သဘာဝဘေး၊ လူလုပ်သင့်ဘေး၊ တိုက်ပွဲ၊ လက်နက်နဲ့ ကြွင်းကျန်လက်နက်များကြောင့် ထိခိုက်၊ ဒဏ်ရာရ၊ သေဆုံးသွားတဲ့ ဒေသခံတွေနဲ့ ပြည်သူ့ပိုင် တိရိစ္ဆာန်တွေရဲ့ စာရင်းတွေကို ကောက်ယူပြီး မှတ်တမ်းယူ ကူညီပေးခြင်းတို့လည်း လုပ်ငန်းစဉ်တွေထဲမှာ ပါဝင်ပါတယ်။
ဒါကြောင့် တအာင်းဒေသထဲမှာ နေထိုင်ကြတဲ့ လူထုတွေအနေနဲ့ PSLF/TNLA ဗဟို အထွေထွေ အုပ်ချုပ်ရေးဦးစီးဌာန ရုံးကို မေးမြန်းလိုတာ၊ တင်ပြဖို့ လိုတာ၊ အဖွဲ့အစည်းရဲ့ မူဝါဒရပ်တည်ချက်နဲ့ လုပ်ဆောင်ချက်တွေကို သိလိုတာနဲ့ လက်နက်ကိုင်တပ်ဖွဲ့ တစ်ခုခုရဲ့ ဖိနှိပ်မှု၊ လူ့အခွင့်အရေးချိုးဖော်မှုတွေ ကြုံတွေ့ရတာရှိရင် ပြည်သူ့ဆက်ဆံရေးစင်တာ – (Public Relations Center – PRC) ကို ဆက်သွယ်တင်ပြနိုင်တယ်လို့ ဆိုပါတယ်။
ပြည်သူ့ဆက်ဆံရေးစင်တာကို လွန်ခဲ့တဲ့ ၂၀၁၅ ခုနှစ်ကတည်းက PSLF/TNLA ဗဟိုက ဖွဲ့စည်းခဲ့တာဖြစ်ပြီး ၁၀၂၇ စစ်ဆင်ရေးနောက်ပိုင်းမှာ စင်တာရဲ့ လုပ်ငန်းစဉ်တွေ ရပ်တန့်ခဲ့ပေမဲ့ ဒီနေ့ ဖေဖော်ဝါရီ ၁၃ ရက်မှာတော့ လုပ်ငန်းစဉ်တွေ ပြန်လည် အကောင်အထည်ဖော်စပြုလာတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
