အလင်း၊ ဖေဖော်ဝါရီ ၁၃ ရက်၊ ဟားခါး
ချင်းပြည်နယ်၊ ဟားခါးမြို့မှာ ရဲတပ်ဖွဲ့ဝင်တွေ တိုက်ခိုက်ခံရပြီး အရာရှိတစ်ဦးအပါအဝင် ၃ ဦး သေဆုံးကာ ၅ ဦး ပြင်းထန်ဒဏ်ရာရရှိခဲ့တယ်လို့ ချင်းကာကွယ်ရေးတပ် (ဟားခါး) က ဒီနေ့ ဖေဖော်ဝါရီ ၁၃ ရက်မှာ ထုတ်ပြန်ပါတယ်။
ပြည်သူလူထုထံမှ အတင်းအဓမ္မ ငွေကြေးကောက်ခံမှုတွေ လုပ်ဆောင်နေတဲ့ ရဲတပ်ဖွဲ့ဝင်တွေ လိုက်ပါလာတဲ့ မော်တော်ယာဉ်ကို CDF-Hakha က မနေ့ ဖေဖော်ဝါရီ ၁၂ ရက် ည ၇ နာရီဝန်းကျင်မှာ ကြားဖြတ်တိုက်ခိုက်ခဲ့တာဖြစ်ပါတယ်။
“ပြည်သူဆီက အတင်းအဓမ္မ ငွေကြေးတောင်းခံပြီး ပြန်လာတဲ့ ရဲတပ်ဖွဲ့ဝင်တွေ ကားကို မြို့တွင်း စစ်ဆင်ရေးအနေနဲ့ တိုက်ခိုက်ခဲ့တာပါ။ ရဲတပ်ဖွဲ့ဝင် အရာရှိတစ်ဦးအပါ ၃ ယောက် သေဆုံးတယ်။ ၅ ယောက်ကတော့ ပြင်းထန်ဒဏ်ရာရတယ်လို့ ကြားတယ်။” လို့ CDF-Hakha ရဲဘော်တစ်ဦးက ရွှေဖီမြေသို့ ပြောပါတယ်။
ဟားခါးမြို့မှာ တာဝန်ကျတဲ့ ရဲအရာရှိတွေဟာ အလွန်ရိုင်းစိုင်း ကြမ်းတမ်းပြီး လက်အောက်ငယ်သားတွေကို မြို့တွင်းနေ ပြည်သူလူထုထံမှ တစ်နေ့ သိန်း ၃၀ ခန့် အတင်းတောင်းယူခိုင်းကာ ဗျူဟာမှူးကို ကန်တော့လေ့ရှိတယ်လို့ CDF-Hakha က ဆိုပါတယ်။
အခုလို စစ်ကောင်စီအနေနဲ့ ပြည်သူတွေထံမှ မတရားငွေကြေးကောက်ခံမှုတွေ ထပ်မံ ပြုလုပ်ပါက ယခုထက် ပိုမိုပြင်းထန်တဲ့ စစ်ဆင်ရေးတွေကို ဖော်ဆောင်သွားမယ်လို့ CDF-Hakha က သတိပေး ပြောဆိုထားပါသေးတယ်။
၎င်းတို့ တိုက်ခိုက်ခံရပြီးနောက်မှာ စစ်ကောင်စီရဲ့ ဟားခါး ရုန်းတောင်ဗျူဟာကုန်းကနေ မြို့အနီးအနားရှိ အရပ်သားတွေ နေထိုင်တဲ့ ကျေးရွာတွေကို လက်နက်ကြီးကျည်တွေ ရမ်းသမ်း ဆက်တိုက်ပစ်ခတ်နေတယ်လို့ သိရပါတယ်။
ဒီနေ့ ဖေဖော်ဝါရီ ၁၃ ရက် နံနက်ပိုင်းအထိ ဟားခါးမြို့အတွင်း စစ်ကောင်စီဘက်မှ လုံခြုံရေးတွေကို အထူးတင်းကျပ်ထားပြီး စစ်ဆေးမှုတွေ ပြုလုပ်နေတာကြောင့် မြို့ခံပြည်သူတွေမှာ စိုးရိမ်ထိတ်လန့်နေကြရတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
