လွေးလာဝ်ဇာရ်၊ ဖေဖော်ဝါရီ ၁၂ ရက်၊ မောက်မယ်
ရှမ်းတောင် မောက်မယ်မြို့နယ်ထဲက ကျေးရွာ ၃ ရွာထဲကို တိုက်ပွဲဖြစ်ပွားခြင်းမရှိဘဲ စစ်ကောင်စီရဲ့ လက်အောက်ခံတပ်တဲ့ ပအိုဝ်းပြည်သူ့စစ် PNO အဖွဲ့က လက်နက်ကြီးနဲ့ အသေခံဒရုန်း ပစ်ခတ်တိုက်ခိုက်ခဲ့တာကြောင့် ဒေသခံတွေရဲ့ နေအိမ်အလုံး ၂၀ ကျော် ပျက်စီးသွားခဲ့တယ်လို့ ပအိုဝ်းအမျိုးသား လွတ်မြောက်ရေးတပ်မတော် PNLA ရဲ့ ပြောရေးဆိုခွင့်ရှိသူ ခွန်ရိန်းယံက ရွှေဖီမြေကို ပြောပါတယ်။
မနေ့ ဖေဖော်ဝါရီ ၁၁ ရက်မှာ ဗန်းမတ်ကျေးရွာထဲကို PNO အဖွဲ့ဘက်က အသေခံဒရုန်းနဲ့ လက်နက်ကြီးတွေပါ ပစ်ခတ်တိုက်ခိုက်ခဲ့ပြီး အဲဒီ အသေခံဒရုန်းတစ်စီးကိုလည်း PNLA တပ်က ဖမ်းဆီးနိုင်ခဲ့လို့ ဆိုပါတယ်။
“ဗန်းမတ်ရွာထဲကို PNO အဖွဲ့တွေက အသေခံဒရုန်းတွေနဲ့ တိုက်ခိုက်ခဲ့တာ ဖြစ်ပါတယ်။ လက်နက်ကြီးတွေနဲ့လည်း တစ်နေ့လုံးနီးပါး ပစ်တယ်။ ပုံထဲက ကျနော်တို့သိမ်းမိရတဲ့ အသေဒရုန်းဘဲ ဖြစ်ပါတယ်” လို့ PNLA ရဲ့ ပြောရေးဆိုခွင့်ရှိသူ ခွန်ရိန်းယံက ပြောပါတယ်။
PNO အဖွဲ့မှ ပစ်ခတ်လိုက်တဲ့ လက်နက်ကြီးတွေဟာ ဗန်းမတ်၊ မုဲင်းဟုဲင်းနဲ့ ဟမ်းဗွာကျေးရွာတွေထဲ ကျရောက်ပေါက်ကွဲခဲ့တာဖြစ်ပြီး စုစုပေါင်း နေအိမ် အလုံး ၂၀ ကျော် ထိခိုက်ပျက်စီးသွားတယ်လို့ သိရပါတယ်။
ဒါ့အပြင် အဲဒီကျေးရွာက ဒေသခံတွေလည်း ဘေးလွတ်ရာကို ရွာလုံးကျွတ် ထွက်ပြေး တိမ်းရှောင်နေကြရတယ်လို့ ဆိုပါတယ်။
“ဒါက တိုက်ပွဲဖြစ်ပွားတဲ့ဒေသလည်း မဟုတ်ဘူး။ ပြည်သူတွေနေတဲ့ ရွာကို အခုလို လက်နက်ကြီးနဲ့ ဒရုန်းတိုက်ခိုက်နေတာဟာ မလုပ်သင့် မဖြစ်သင့်တဲ့ လုပ်ရပ်တွေကို အကြိမ်ကြိမ်ကျူးလွန်နေတာ ဖြစ်ပါတယ်။ ပြည်သူတွေလည်း ရွာထဲ မနေရဲကြတော့ဘူး။ တောတောင်တွေဘက် ထွက်ပြေးတိမ်းရှောင်နေရတယ်” လို့ ခွန်ရိန်းယံက ပြောပါတယ်။
အဲဒီဒေသမှာ တိုက်ပွဲဖြစ်ပွားခြင်းမရှိဘဲ ဒေသခံတွေ နေထိုင်တဲ့ ကျေးရွာထဲကို PNO အဖွဲ့ဘက်က အခုလို လက်နက်ကြီးနဲ့ ဒရုန်း ပစ်ခတ်တိုက်ခိုက်နေတာဟာ စစ်ရာဇဝတ်မှု ကျူးလွန်တဲ့ဖြစ်ရပ်တွေ ဖြစ်တယ်လို့ ဆိုပါတယ်။
ပြီးခဲ့တဲ့ ဇန်နဝါရီ ပထမအပတ်ကလည်း စစ်ကောင်စီတပ်နဲ့ PNO အဖွဲ့တွေဟာ ခြိင်နန်ရွာထဲကို စစ်ကြောင်းထိုး ဝင်ရောက်လာပြီး ရွာလုံးကျွတ် မီးရှို့ဖျက်ဆီးသွားခဲ့တဲ့ ဖြစ်စဉ် ဖြစ်ပွားခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
