ခိုင်လေး၊ ဇန်နဝါရီ ၂၁ ရက်
၁၀၂၇ စစ်ဆင်ရေး ဒုတိယလှိုင်း စတင်တဲ့ ၂ဝ၂၄ ဇွန်လကစပြီး တရုတ်ဘက်က ၆ လကျော်ကြာ ပိတ်ထားတဲ့ တရုတ်နယ်စပ်ဂိတ်တွေကို ပြန်ဖွင့်ပေးလိုက်ပြီလို့ “ဝ”တပ်မတော်- UWSA ရဲ့ ဦးစီးချုပ်ရုံးမှ မနေ့ ဇန်နဝါရီ ၂၀ ရက်မှာ ထုတ်ပြန်လာပါတယ်။
ကိုးကန့်-တရုတ်နယ်စပ်ဂိတ်ဖြစ်တဲ့ ချင်းရွှေဟော်၊ လောက်ကိုင်အပြင် “ဝ”-တရုတ်နယ်စပ်က နမ့်တစ် (မန်ခါး)ဂိတ်တို့ကို မနေ့ကစပြီး ပြန်ဖွင့်ပေးခဲ့ကာ ဓာတ်ဆီလည်း ပြန်လည် တင်သွင်းနေပြီဖြစ်ကြောင်း ဒေသခံတွေဆီကတဆင့် သိရပါတယ်။
ကိုးကန့်တပ် ထိန်းချုပ်ထားတဲ့ ကွမ်းလုံမြို့မှ အမျိုးသမီးတစ်ဦးက “မနေ့က ပြန်ဖွင့်လိုက်တာ ကြားတယ်။ တရုတ်ဘက်ကနေ တရုတ်မုန့်တို့၊ ဘီယာတို့ စဝင်နေပြီ။ ချင်းရွှေဟော်၊ လောက်ကိုင်ဂိတ်လည်း ပြန်ဖွင့်ပြီ။ ဓာတ်ဆီတွေလည်း ရောက်နေပြီ။ ဓာတ်ဆီဈေးတွေတော့ အတိအကျ မသိရသေးဘူး” လို့ ပြောပါတယ်။
ကိုးကန့်ဒေသနဲ့ “ဝ”ပြည်နယ် ဟိုပန်မြို့သို့ ဆက်သွယ်ထားတဲ့ ဖောင်ဆိပ်တံတားကနေလည်း မော်တော်ယာဉ်၊ လူနဲ့ ကုန်စည်ကို လွတ်လပ်စွာ သွားလာခွင့် ပြုလိုက်ကြောင်း တရုတ်နိုင်ငံရဲ့ မြန်မာနိုင်ငံဆိုင်ရာရုံးမှ အကြောင်းကြားစာ ရရှိခဲ့တယ်လို့ ဆိုပါတယ်။
စစ်ဘက်ဆိုင်ရာ ထောက်ပံ့ရေးပစ္စည်းကလွှဲပြီး လူသုံးကုန်ပစ္စည်းအားလုံးကို ပုံမှန်အတိုင်း ရောင်းဝယ်ဖောက်ကားနိုင်ကြောင်းလည်း ဖော်ပြထားပါတယ်။
UWSA ရဲ့ ပြောရေးဆိုခွင့်ရှိသူ ဦးညီရန်းက “ဟုတ်တယ် ဒီနေ့(ဇန်နဝါရီ ၂ဝ ရက်)ဘဲ ပြန်ပွင့်လိုက်ပြီ။ ကန့်သတ်ချက်တွေလည်း ပယ်ဖျက်လိုက်ပြီ” ဆိုပြီး ရွှေဖီမြေကို အတည်ပြု ပြောဆိုထားပါတယ်။
ကိုးကန့်တပ်- MNDAA နဲ့ စစ်ကောင်စီတို့အကြား တရုတ်နိုင်ငံ ကူမင်းမြို့မှာ ဇန်နဝါရီ ၁၆ ရက်နဲ့ ၁၇ ရက်က တွေ့ဆုံဆွေးနွေးပြီးနောက် အပစ်အခတ် ရပ်စဲလိုက်ကြောင်း တရုတ်နိုင်ငံခြားရေးဝန်ကြီးဌာနရဲ့ ပြောရေးဆိုခွင့်ရှိသူ မော်နင်းက မနေ့ ဇန်နဝါရီ ၂၀ ရက် သတင်းစာရှင်းလင်းပွဲမှာ ပြောကြားခဲ့ပါတယ်။
၁၀၂၇ စစ်ဆင်ရေး ၂ ကြိမ်အတွင်း ရှမ်းမြောက်ရှိ တရုတ်-မြန်မာနယ်စပ်ဂိတ် ၅ ခုဖြစ်တဲ့ ကျင်စန်းကျော့၊ ချင်းရွှေဟော်၊ ရန်လုံကျိုင်း၊ မုံးကိုးနဲ့ နမ့်ခမ်းဂိတ်တွေကို ညီနောင်မဟာမိတ် ၃ ဖွဲ့ထံ စစ်တပ်က လက်လွှတ်ဆုံးရှုံးခဲ့ရပါတယ်။
