လွေးဇွန်မိုး၊ ဖေဖော်ဝါရီ ၂ ရက်၊ ကွတ်ခိုင်
ရှမ်းမြောက် ကွတ်ခိုင်မြို့နယ် ကောင်းခါးမြို့သစ် ရေလှောင်တမံမှာ ရေနစ်သေဆုံးသွားတဲ့ ကျောင်းသားရဲ့ ရုပ်အလောင်းကို ပြန်တွေ့ပြီလို့ ရွှေဖီမြေက စုံစမ်းသိရပါတယ်။
အဆိုပါ ကျောင်းသားဟာ ပြီးခဲ့တဲ့ ဖေဖော်ဝါရီ ၁ ရက် နေ့လည် ၁၂ နာရီဝန်းကျင်မှာ သူငယ်ချင်းတွေနဲ့ ရေသွားကူးရင်းနဲ့ ရေနစ်ခဲ့တာဖြစ်ပြီး မနေ့ ဖေဖော်ဝါရီ ၂ ရက် နေ့လယ် ၃ နာရီခွဲဝန်းကျင်မှာ အလောင်းပြန်တွေ့ခဲ့တာဖြစ်တယ်လို့ ဒေသခံ အမျိုးသားတစ်ဦးက ပြောပါတယ်။
“ကျောင်းသားတွေလေ။ မနေ့က တနင်္ဂနွေနေ့။ အဲဒါ ကျောင်းပိတ်ရက်ဆိုတော့ သူတို့က အဲမှာ ရေသွားကစားရင်းနဲ့ ရေသွားကူးကြရင်းနဲ့ နစ်သွားတယ်တဲ့။ အဲဒါ သူတို့ သူငယ်ချင်းအချင်းချင်း ကယ်ကြသေးတယ်။ နောက် ကယ်လို့မရတာနဲ့ ရွာပြန်လာပြီးတော့မှ လူကြီးတွေကို ပြောပြပြီး ဝိုင်းရှာကြတာ”
အဆိုပါ ရေနစ်သေဆုံးသွားတဲ့ ကျောင်းသားဟာ အထက ကောင်းခါးကျောင်းမှာ ၉ တန်းတက်နေတဲ့ မောင်လွမ်းခေါင် ဆိုသူဖြစ်ပြီး မူဆယ်မြို့နယ် စယ်လန့်ကျေးရွာ ဇာတိဖြစ်တယ်လို့ အထက်ပါအမျိုးသားက ပြောပါတယ်။
မောင်လွမ်းခေါင်ရဲ့ ရုပ်အလောင်းကိုတော့ ၎င်းရဲ့ ဇာတိရွာဖြစ်တဲ့ စယ်လန့်ကျေးရွာဘက်ကို ပြန်သယ်သွားပြီလို့ သိရပါတယ်။
အလားတူ ပြီးခဲ့တဲ့ ဇန်နဝါရီ ၂၆ ရက် နေ့လယ် ၂ နာရီဝန်းကျင်မှာလည်း နမ့်ခမ်းမြို့ သာယာကုန်းရပ်ကွက်ရှိ ရာဘာခြံအနီးက ရေအိုင်ထဲမှာ အသက် ၁၁ နှစ်အရွယ် မောင်ဒေဝစ်ကြာ ဆိုသူဟာ ရေဆင်းဆော့ရာကနေ ရေနစ်သေဆုံးသွားခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
