ရွှေဖီမြေ၊ ဇန်နဝါရီ ၂၉ ရက်၊ မိုးမိတ်
တရုတ်အကူအညီနဲ့ ပြန်ရခဲ့တဲ့ ရှမ်းမြောက် မိုးမိတ်မြို့မှာ စစ်ကောင်စီတပ်က ၂ လနီးပါးကြာတဲ့အထိ အုပ်ချုပ်ရေးလုပ်ငန်းတွေ မလည်ပတ်နိုင်သေးဘူးလို့ မြို့ခံတွေက ရွှေဖီမြေကို ပြောပါတယ်။
“အခုထိ ဘာမှ မလည်ပတ်နိုင်သေးဘူး။ နောက်လကျရင် လာမယ်လို့ ကြားတယ်။ မြို့ထဲမှာတော့ တချို့က ပြန်လာကြတယ်။ မြို့ခံတွေအားလုံးတော့ ပြန်မလာနိုင်သေးဘူး” လို့ မိုးမိတ်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
စစ်ကောင်စီတပ်ဟာ မိုးကုတ် – မိုးမိတ်လမ်းပိုင်းကို နယ်မြေရှင်းလင်းရေးတွေ လုပ်ဆောင်နေပြီး ၎င်းရဲ့ လက်အောက်ခံဝန်ထမ်းတွေကို ခေါ်ဆောင်လာနိုင်တဲ့ အခြေအနေမှာ မရှိသေးဘူးလို့ သိရပါတယ်။
မိုးကုတ်နဲ့ မိုးမိတ်ကြားမှာ စစ်ကောင်စီနဲ့ တော်လှန်ရေးတပ်တွေအကြား မကြာခဏ တိုက်ပွဲဖြစ်ပွားနေသလို မိုးမိတ်မြို့ပြင်မှာလည်း ကချင်တပ်မတော်- KIA က တပ်စွဲထားပါတယ်။
မန္တလေးတိုင်း မိုးကုတ်မြို့မှာတော့ စစ်ကောင်စီတပ်က Non CDM ဝန်ထမ်းတွေကို ခေါ်သွင်းနေပြီး အုပ်ချုပ်ရေးယန္တရားတွေ လည်ပတ်နိုင်ဖို့ ကြိုးစားနေတယ်လို့ မိုးကုတ်ဒေသခံတွေဆီက သိရပါတယ်။
စစ်ကောင်စီတပ်ဟာ တရုတ်နိုင်ငံရဲ့ ကြားဝင်မှုနဲ့ ပြီးခဲ့တဲ့ နိုဝင်ဘာ ၂၉ ရက်နဲ့ ၃၀ ရက်မှာ တအာင်းတပ်မတော်- TNLA ထိန်းချုပ်ထားတဲ့ မိုးမိတ်နဲ့ မိုးကုတ်မြို့ထဲကို ဝင်ရောက်လာတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
