ရွှေဖီမြေ၊ ဇန်နဝါရီ ၂၈ ရက်၊ ကျိုက်ထို
ကရင်အမျိုးသားအစည်းအရုံး (KNU) ကော်သူးလေအုပ်ချုပ်နယ်မြေ ဒူးသထူ(သထုံ)ခရိုင်၊ ကျိုက်ထိုမြို့နယ်နဲ့ ခလယ်လွီထူ(ညောင်လေးပင်)ခရိုင် လယ်ဒိုမြို့နယ်မှာ စစ်ကောင်စီတပ်ရဲ့ လက်နက်ကြီးပစ်ခတ်မှုနဲ့ လေကြောင်းတိုက်ခိုက်မှုကြောင့် ကလေးငယ် ၂ ဦးနဲ့ အမျိုးသမီးတစ်ဦးတို့ ထပ်မံသေဆုံးသွားခဲ့တယ်လို့ KNU က မနေ့ ဇန်နဝါရီ ၂၇ ရက် ညမှာ ထုတ်ပြန်ထားပါတယ်။
ပြီးခဲ့တဲ့ ဇန်နဝါရီ ၂၆ ရက် ည ၉ နာရီခွဲဝန်းကျင်မှာ တိုက်ပွဲဖြစ်ပွားတာမရှိပဲ စစ်ကောင်စီရဲ့ (အမှတ်-၄၄) ခြေမြန်တပ်မဌာနချုပ် လက်အောက်ရှိ ခြေမြန်တပ်ရင်း (ခမရ-၃) ကနေ ကျိုက်ထိုမြို့နယ် အလူးကြီးရွာ၊ ဝါးသိမ်ရွာနဲ့ ညောင်ထောက်ရွာဘက်ကို (၁၂၀) မမ လက်နက်ကြီး (၃) လုံးပစ်ခတ်ခဲ့တာလို့ ဆိုပါတယ်။
အဲဒီလက်နက်ကြီး ပစ်ခတ်မှုကြောင့် အသက် ၃ နှစ်အရွယ် မိုးရွှေစင်နဲ့ အသက် ၅၉ နှစ်အရွယ် နော်အေးဝင်းတို့ လက်နက်ကြီးစ ထိမှန်သေဆုံးခဲ့ပြီး အသက် ၂၇ နှစ်အရွယ် နော်သော်တာ ဆိုသူရဲ့ ညာလက်မောင်းမှာ ထိမှန်ဒဏ်ရာရခဲ့တယ်လို့ ဖော်ပြထားပါတယ်။
အလားတူ ပြီးခဲ့တဲ့ ဇန်နဝါရီ ၂၅ ရက်ညမှာလည်း လယ်ဒိုမြို့နယ် ကွီးလါးကျေးရွာထဲကို တောင်ငူလေတပ်ကနေတက်လာတဲ့ ဂျက်ဖိုက်တာတစ်စီးနဲ့ ဗုံး ၆ လုံးကြဲချခဲ့တာကြောင့် အသက် ၇ နှစ်အရွယ် စောအယ်လောလမူး ထိမှန်သေဆုံးခဲ့ပြီး အသက် ၉ နှစ်အရွယ် စောအယ်နားဒိုမူး၊ ၁၃ နှစ်အရွယ် စောအယ်မူးခီသောနဲ့ ၁၁ နှစ်အရွယ် စောအယ်လဲပွယ်မူးတို့ ထိခိုက်ဒဏ်ရာရခဲ့တယ်လို့ ထုတ်ပြန်ထားပါတယ်။
ဒါ့အပြင် စစ်ကောင်စီရဲ့ လက်နက်ကြီးပစ်ခတ်မှုနဲ့ လေကြောင်းတိုက်ခိုက်မှုကြောင့် အရပ်သားနေအိမ် ၆ လုံးလည်း ပျက်စီးခဲ့တယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
