အလင်း၊ ဇန်နဝါရီ ၁၅ ရက်၊ ရခိုင်
အာရက္ခတပ်တော် (ULA/AA) ထိန်းချုပ်ထားတဲ့ ရခိုင်ပြည်နယ်တောင်ပိုင်း၊ တောင်ကုတ်မြို့နယ်နဲ့ ဂွမြို့နယ်မှာ စစ်ဘေးရှောင် လူငယ်တစ်ဦးအပါအဝင် အမျိုးသားနှစ်ဦး လုယက်သတ်ဖြတ်ခံခဲ့ရတယ်လို့ ဒေသခံတွေဆီက သိရပါတယ်။
တောင်ကုတ်မြို့၊ ကံပိုင်ရပ်ကွက်မှာ နေထိုင်တဲ့ အသက် (၆၀) ကျော်အရွယ် ဦးခင်မောင်ညွန့်ဟာ သူနေတဲ့အိမ်မှာ ဇန်နဝါရီလ ၁၃ ရက်နေ့၊ မနက် ၇ နာရီဝန်းကျင်မှာ ဓားပြတိုက်ခံရပြီး သတ်ဖြတ်ခံရတယ်လို့ သိရပါတယ်။
“ဦးလေးရဲ့ မိန်းမက မနက်အစော ကားကြီးကွင်းမှာ စျေးရောင်းဖို့ ထွက်တော့ အိမ်မှာ တစ်ယောက်တည်း ကျန်ခဲ့တာ။ အဲအချိန်မှာ ဓားမြတိုက်ခိုက်ခံရတာပါ။ လည်ပင်းကိုလည်း ဓားထိုးပြီး အိမ်နောက်ဖက်မှာ ရေမြောင်းမှာ ပစ်ထားခဲ့တယ်။” လို့ တောင်ကုတ်မြို့ခံ အမျိုးသမီးတစ်ဦးက ရွှေဖီမြေသို့ ပြောပါတယ်။
ဓားပြတိုက်ခိုက်ခံရပြီး ငွေသား သိန်း ၇၀ ကျော်လည်း ပျောက်ဆုံးသွားတယ်လို့ သိရပါတယ်။
အလားတူ ဂွမြို့နယ်၊ ကျိန္တလီမြို့၊ ကိုင်းတောကွင်းရွာမှာလည်း ဇန်နဝါရီလ ၁၀ ရက်က အသက် (၁၅) နှစ်အရွယ် သံတွဲမြို့နယ်က စစ်ဘေးရှောင်တဲ့ လူငယ်တစ်ဦး လမ်းမှာ ဆိုင်ကယ်လုယက် သတ်ဖြတ်ခံရတယ်လို့ သိရပါတယ်။
“သံတွဲကနေ ဂွဘက်မှာ စစ်ဘေးရှောင်တဲ့ လူငယ်ပါ။ သူက ကလေးတွေကို စာသင်နေတာ။ ကိုင်းတောကွင်းရွာကနေ အပြန်လမ်းမှာ ဆိုင်ကယ်လုခံရတာပါ။ လှည်းပင်း၊ ရင်အုံ၊ ဝမ်းဗိုက် တကိုယ်လုံး ဓားထိုးခံရတဲ့ဒဏ်ရာတွေနဲ့ပါ။” လို့ ဂွမြို့နယ် စစ်ဘေးရှောင် အမျိုးသားတစ်ဦးက ရွှေဖီမြေသို့ ပြောပါတယ်။
လက်ရှိမှာ ဓားပြတိုက်ပြီး လူသတ်မှု ကျူးလွန်တဲ့ တရားခံတွေကို ဖမ်းမိနိုင်ရေးအတွက် အာရက္ခတပ်တော် (AA) ရဲ့ ရဲတပ်ဖွဲ့တွေက ဆက်လက်စုံစမ်းဆောင်ရွက်နေတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
